- Dende o luns ata onte unha delegación de xóvenes cooperativistas de Irlanda mantiveron reunións coas cooperativas CLUN e Aira, do sector leiteiro, e con persoal técnico de Agaca.
- A viaxe realízana nun proxecto formativo de ICOS (Sociedade Irlandesa de Organizacións Cooperativas).
Agaca (Asociación Galega de Cooperativas Agro-alimentarias) acolleu a unha delegación de ICOS formada por xóvenes gandeiros (5 do sector leiteiro e 1 produtor de carne) e un técnico especializado en gobernanza, lexislación e desenvolvemento cooperativo que visitan Galicia como parte do proxecto para o desenvolvemento profesional de xóvenes granxeiros de ICOS Skillnet.
Os obxectivos principais da viaxe foron coñecer as prácticas que as cooperativas galegas empregan para incentivar a incorporación de persoas mozas e de mulleres, ademais do sistema de gobernanza.
O luns visitaron Aira (Taboada), onde se foron recibidos polo seu presidente, José Manuel Tellado (quen tamén é vicepresidente de Agaca), e polo seu director xeral, Daniel Ferreiro, que explicaron servizos e funcionamento de la entidade. Ademais, coñeceron a gandería leiteira Novoa S.C.
O martes estiveron en Clun (Ames) onde se reuniron coa vicepresidenta da entidade, Carmen Rodríguez (quen tamén é presidenta de Agaca), e cunha delegación de integrantes de Mulleres de Seu, a agrupación de mulleres de Clun, pois a visita centrouse nas estratexias que empregan para conseguir maior participación feminina. Pola tarde desprazáronse á gandería Sar de Serráns (Mazaricos), que produce leite da gama premium da cooperativa.
O mércores tiveron un encontro con Miguel Sáenz de Viteri, asesor legal de Agaca, e con Higinio Mougán, director-xeral da entidade, acerca de aspectos normativos e gobernanza, e con Gabriel Trenzado, director xeral de Cooperativas Agro-alimentarias de España, quen lles resumiu a situación do sector agroalimentario nacional. Finalmente, Bernadette Fernández, técnica do departamento de calidade de Agaca, detallou as diferentes certificacións e procesos de auditoría que poden cumprir as granxas galegas.
