A Asociación Galega de Cooperativas Agroalimentarias (AGACA) pon en marcha un novo curso en liña de Incorporación á empresa agraria. Vacún de leite, que dará comezo nos últimos días do mes de xaneiro e se desenvolverá na plataforma de teleformación de AGACA.
O prazo de inscrición xa está aberto e pode realizarse a través do Formulario de inscrición
Esta acción formativa está dirixida a persoas que desexan incorporarse á actividade agraria no sector lácteo e ofrece un itinerario completo de 250 horas lectivas, orientado a dotar o alumnado dos coñecementos técnicos, económicos e de xestión necesarios para iniciar e consolidar unha explotación de vacún de leite.
As sesións impartiranse na modalidade de teleformación a través da plataforma de AGACA e cada un dos módulos contará, ademais, con catro horas presenciais que se desenvolverán en O Rodo, S. Coop. Galega, en Rodeiro (Pontevedra).
Programa
O programa do curso aborda de maneira integral os principais ámbitos que interveñen na xestión dunha empresa agraria.
Módulo 1.– A EMPRESA AGRARIA (30 horas)
Módulo 2.– XESTIÓN TÉCNICO-ECONÓMICA DA EMPRESA AGRARIA (30 horas)
Módulo 3.– ASOCIACIONISMO, COMERCIALIZACIÓN E TRAZABILIDADE (30 horas)
Módulo 4.– RELACIÓNS LABORAIS E PREVENCIÓN DE RISCOS LABORAIS (30 horas)
Módulo 5.– SENSIBILIZACIÓN MEDIOAMBIENTAL (30 horas)
Módulo 6.– AGROTECNOLOXÍA (30 horas)
Módulo 7.– PRODUCIÓN DE FORRAXES E ALIMENTACIÓN DO GANDO (40 horas)
Módulo 8.– PRODUCIÓN DE LEITE E MANEXO DO GANDO (30 horas)
O curso enmárcase no Plan de apoio ao fortalecemento e consolidación das cooperativas agroalimentarias galegas 2025-2027, unha iniciativa estratéxica impulsada por AGACA cunha duración de tres anos, orientada a mellorar a competitividade, a sostibilidade e a resiliencia das cooperativas socias e das súas explotacións. Este plan combina a elaboración de plans de empresa, a formación cualificada das persoas socias e a asistencia técnica especializada para implantar melloras na xestión e nos sistemas produtivos.
No ámbito formativo, o plan prevé un itinerario específico de incorporación á empresa agraria en vacún de leite, homologado pola Consellería do Medio Rural, que permite obter unha cualificación oficial e dá resposta a retos clave do sector como o relevo xeracional, a profesionalización da actividade, a mellora da rendibilidade das explotacións e a adaptación ás novas esixencias en materia de sostibilidade, benestar animal e boas prácticas de manexo.
Financiamento
O proxecto enmárcase dentro do programa EFESO (Estratexia de Fomento do Emprego e da Sostibilidade na Economía Social) e está cofinanciado con 360.335,34 euros polo Fondo Social Europeo Plus (FSE+), a través da Confederación Empresarial Española da Economía Social (CEPES), en calidade de organismo intermedio. As actuacións desenvolveranse entre xaneiro de 2025 e decembro de 2027, coa finalidade de apoiar o crecemento, o fortalecemento e a consolidación das cooperativas agroalimentarias galegas socias que desexen afrontar o reto de implantar melloras na xestión e nos sistemas de produción.
