Iris López, Marisol Ares, Adán Rivera, Tamara Pérez e Zoe Cantero son os mozos e mozas que a día de hoxe están desenvolvendo as súas prácticas nas cooperativas Viña Costeira, Aira, O Rodo, A Carqueixa e Bodegas Eidosela, como participantes deste programa que xa vai pola terceira edición. Aínda que levan pouco tempo traballando imos coñecelas mellor:
Iris López Sánchez, técnica de apoio en Viña Costeira.
Grao en Administración e Dirección de Empresas. Máster en Control de Xestión.
«Estou moi agradecida por esta oportunidade de coñecer de preto o día a día dunha cooperativa en plena expansión»
Aínda que a súa experiencia laboral comeza no ano 2016, é a primeira vez que Iris se achega profesionalmente a unha cooperativa. A coñe- cida adega vitivinícola asentada preto de Ribadavia (Ourense), Viña Costeira, é a entidade na que está a desenvolver as súas prácticas ata o mes de xuño, data prevista de finalización.
Os avós de Iris eran socios da cooperativa agraria da súa comarca, explica Iris, quen tras levar algo máis de mes e medio en Viña Costeira recoñece que, a pesar de ter as súas peculiaridades ao «sumar á ecuación aos socios», hai moitas seme- llanzas, no xeito de traballar, coas multinacionais nas que estivo con anterioridade.
A parte fácil da súa estancia formativa é «formar parte dun equipo atento e próximo», indica, mentres recoñece: «Talvez, a parte máis complicada fose adaptarme ás distintas funcións que poden ter os socios dentro da cooperativa».
Aínda que de momento a experiencia é breve, esta profesional está agradecida por esta «oportunidade de coñecer de preto o día a día dunha cooperativa en plena expansión» e destaca as bondades de traballar nunha cooperativa: «Están implícitos uns valores de apoio, equidade e responsabilidade que considero fundamentais para o desenvolvemento da comunidade».
Marisol Ares Tubío, técnica de apoio en Aira
Grao en Administración e Dirección de Empresas. Técnica Superior en Xestión e Organización de Empresas Agropecuarias.
«O cooperativismo paréceme o mellor modelo empresarial para acadar unha sociedade xusta e sostible»
Marisol Ares leva dende principios de xaneiro colaborando na cooperativa de subministración de pensos Aira, principalmente co departamento de contabilidade. Con anterioridade traballou en diversas empresas agrarias, sobre todo en postos de contacto co cliente, en pedidos ou loxística.
Ares recoñece que, a pesar de non ter traballado nunca antes nunha cooperativa, aptececíalle: «Grazas aos seus principios e valores distintivos, paréceme o mellor modelo empresarial para acadar unha sociedade xusta e sostible».
Malia levar poucos meses en Aira, parécelle albiscar aspectos de xestión similares aos doutras empresas convivindo con outros máis específicos: «O feito de que os socios poidan ser á vez propietarios, clientes e provedores xera unha relación complexa con estes, pois as decisións tomadas sempre lles afectan nalgún dos seus papeis».
Preguntada pola parte máis doada e máis complicada da experiencia matiza: «O programa ten dous focos de actuación. Por unha parte mellorar a capacitación dos bolseiros cara a ocupar postos de xerencia, e por outra, ofrecer apoio á función xerencial, propoñendo e desenvolvendo un plan de mellora nalgún aspecto. No relativo á miña capacitación, estou moi agradecida coa atención dedicada tanto polo meu titor como polos compañeiros e compañeiras, que se mostraron dende o primeiro momento accesibles, colaborativos e resolutivos. É a parte de levar a cabo un plan de mellora a que me parece máis complexa, pois estamos falando dunha empresa que conta cunha dimensión considerable, e que na actualidade xa está moi organizada e preparada, polo que os posibles aspectos a mellorar son puntos moi concretos, que se presentan cunha certa complexidade, o que significa un reto para min».
Marisol está convencida do seu desexo de continuar traballando no eido cooperativo: «Considero o modelo cooperativo o máis desexable, tamén dende o punto de vista de xerador de emprego. Os seus valores de autoaxuda, democracia, e solidariedade, entre outros, fan das cooperativas empresas especialmente comprometidas e con criterios de responsabilidade social».
Adán Rivera Maldonado, técnico de apoio en O Rodo
Grao en Relacións Laborais e Recursos Humanos. Mediador Civil, Mercantil, Familiar, Laboral e Deportivo
«Dende que coñecín a iniciativa quixen participar nela»
O caso de O Rodo, cooperativa especializada en prestación de servizos de maquinaria agrícola, é lixeiramente distinto ao das outras cooperativas, xa que non conta coa figura dun xerente como tal, por iso Adán Rivera exerce as súas funcións apoiado moi directamente polo Consello Reitor da cooperativa. Entre as actividades que está a desenvolver figuran a compilación de información para a elaboración do Plan Estratéxico, a elaboración de diversas Memorias como as de Responsabilidade Social, Actividade ou Económica, xestións económicas e financeiras, análise de subvencións etc.
Aínda que Adán non contaba con experiencia laboral previa, a súa participación en proxectos diversos evidencia unha preferencia pola fórmula da Economía Social. «Participar nesta iniciativa foi unha verdadeira ilusión. Nunca traballara nunha cooperativa pero sempre foi o meu obxectivo», indica tras especificar que leva tempo investigando en relación coa economía social.
A diferenza doutras empresas que, en ocasións, «empregan ferramentas como as memorias de Responsabilidade Social Empresarial, iniciativas sociais e medioambientais… co fin de mellorar a súa imaxe corporativa pero sen ter un interese efectivo en levalas a cabo», as cooperativas si poden demostrar os principios sobre os que se asentan, indica este recén graduado que rematou os estudos no pasado mes de maio.
Adán xa intentara participar nesta actividade na anterior edición, pero como aínda non rematara os estudos, non fora posible: «Dende que coñecín a iniciativa quixen participar nela», explica aclarando que nestes dous últimos anos estivo preparándose para «pasar á acción no mundo da Economía Social».
Tamara Pérez Abreu, técnica de apoio en Bodegas Eidosela
Grao en Ciencia Política e Administración Pública. Máster de Xestión do Desenvolvemento Sostible como técnico de sostibilidade
«É unha oportunidade única de poderme desenvolver profesionalmente»
É a primeira vez que Tamara traballa nunha cooperativa e, entre outros aspectos, percibe diferenzas na toma de decisións e accións, que é moito máis horizontal, ademais da lexislación, composición e organización. No entanto, segundo recoñece, co apoio de todo o equipo da bodega estalle resultando doado de levar e consegue transformar cada dificultade nun reto.
«Persoalmente é unha oportunidade única: poder desenvolverme de forma profesional nun ámbito como o vitivinícola, que dende sempre me fascinou, resulta moi enriquecedor. Ademais, poder levar á práctica coñecementos en sostibilidade de forma diaria e ver a súa repercusión é gratificante. De forma profesional creo que se abriu unha nova etapa que afronto con moita gana e espero sexa o inicio de algo moi bo», expresa Tamara.
Esta profesional amósase a gusto traballando no ámbito cooperativo porque considera que «unha cooperativa non é só unha empresa senón que supón un valor engadido para a unha sociedade» e destaca os valores nos que se asenta o cooperativismo: a participación dos socios, equidade, solidariedade e democracia.
Tamara opta por sinalar que a natureza cooperativista aínda é unha descoñecida para a sociedade e lamenta que, por falta de información, se recorra a sociedades limitadas ou outras fórmulas antes que á cooperativa.
Zoe Cantero Prieto, técnica de apoio en A Carqueixa.
Grao en Administración de Empresas
«Iniciativas como esta son unha oportunidade para que as persoas graduadas non teñan que marchar da súa terra»
É a primeira vez que esta graduada en ADE traballa no ámbito cooperativo. Ata o de agora, as súas referencias profesionais abarcan o sector da hostalería e o comercio. Acaba de empezar o seu período de prácticas (levaba menos dunha semana cando fixemos esta entrevista) e, aínda que é algo precipitado facer un balance, xa detectou diferenzas con relación a outras empresas: «Aínda que non podo falar doutras cooperativas, nesta atopei un ambiente moi familiar, distinto a calquera das outras empresas nas que traballei».
Para Zoe, a maior dificultade que observa é que «hai que estar preparada para todo, cada día poden xurdir diferentes dificultades»; pola contra, indica: «A parte máis doada son as relacións persoais pois todo o mundo tenta axudarme e facilitarme calquera cuestión».
A pesar do pouco tempo que leva na cooperativa gandeira A Carqueixa, formada por 200 cooperativistas con gando vacún en extensivo maioritariamente da montaña lucense, esta xove destaca «a importancia da existencia de iniciativas como esta, que dan oportunidades a persoas graduadas sen ter que marchar da súa terra, e axudan a organizacións cooperativistas que precisan dun apoio, para desenvolver e promover a súa actividade, polo que ambas as partes vense moi beneficiadas».
Zoe confesa sentirse encantada de poder traballar nun proxecto que dignifica o traballo dos gandeiros a través dunha produción lóxica «na que menos é máis» e onde «o benestar dos animais e do entorno importa, promovendo un rural vivo e montes libres de incendios».
