- Esta mañá un grupo de alumnos do CEIP Plurilingüe Santo Estevo de Parga (Parga) recibiron formación sobre as características do cooperativismo nunha visita á SAT Casa Grande de Xanceda.
- A actividade forma parte da Rede Eusumo, promovida pola Consellería de Economía, Emprego e Industria para impulsar a economía social e o cooperativismo como modelo de negocio de éxito.
Vinte escolares de Primaria do colexio Plurilingüe Santo Estevo de Parga (Guitiriz) participaron esta mañá nunha charla sobre as características do cooperativiso e a importancia da economía social no desenvolvmento do medio rural, impartida por técnicos de AGACA na Casa Grande de Xanceda. A iniciativa enmárcase nun dos Obradorios “Emprendemento e cooperativas. Modelo de éxito” da Rede Eusumo.
A continuación, acompañados por persoal da entidade, nenos e nenas visitaron as instalacións da granxa, que se dedica á fabricación de produtos lácteos ecolóxicos. Deste xeito, o alumnado puido coñecer de primeira man o funcionamento dunha entidade que opera coa base da economía social, neste caso como Sociedade Agraria de Transformación (SAT).
Os escolares aprenderon como se elaboran os queixos e iougues e as rutinas que segue unha granxa, ademais de ter ocasión de alimentar algúns animais que viven na explotación.
Rede Eusumo
Asesoramento, formación, acompañamento nas iniciativas empresariais, apoio á internacionalización, celebración de encontros internacionais e transfronteirizos, intercambio comercial e cooperación transversal son outras áreas de actividade que definen a Rede de colaboración Eusumo, promovida pola Consellería de Economía, Emprego e Industria.
