Agora que estamos a pechar 2022 convén volver a vista atrás e facer un repaso breve da aplicación da Lei da Cadea no sector agroalimentario de Galicia no ano da súa entrada en vigor. A mediados de decembro de 2021 era aprobada a Lei de medidas para mellorar o funcionamento da Cadea Alimentaria, que entraba plenamente en vigor a mediados do mes de xuño do presente ano.
Esta Lei ten unhas diferenzas substanciais de aplicación segundo o sector agrario afectado. Galicia —que produce o 40% da leite de España— vén aplicando as directrices xerais da Lei da Cadea sobre a base dos propios decretos e ordes do sector lácteo dende hai anos. Neste senso, a continuidade na aplicación das normas sectoriais foi a tónica xeral neste sector.
Apreciamos que a aplicación desta Lei non é semellante no resto de sectores produtivos agrarios que estreaban nova norma de aplicación, pero nalgúns sectores fixéronse enormes avances ata acadar a plena aplicación. Refírome á total implantación da Lei da Cadea nas adegas cooperativas: moitas xa viñan aplicando os contratos homologados para as compras de uvas a terceiros non socios, pero, coa entrada en vigor da norma, a totalidade puxo en marcha os Acordos Cooperativos cos propios socios, tal como establece a propia norma. Dende AGACA asesoramos e acompañamos na redacción dos Acordos Cooperativos das adegas que entraron en vigor coa actual vendima.
Dende AGACA asesoramos e acompañamos na redacción dos Acordos Cooperativos nas adegas que entraron en vigor coa actual vendima
Os acordos das adegas cooperativas recolleron todos os aspectos relacionados coas condicións que tiña que ter a uva no intre da vendima, así como as tradicionais normas de vendima de cada adega e o papel dos servizos técnicos neste proceso. Recolléronse tamén os procedementos de determinación do valor do produto, comezando por concretar a determinación das cantidades e calidades das uvas entregadas polas persoas socias e o procedemento de determinación do valor das uvas entregadas, as datas de pago da cooperativa e outros aspectos relacionados. Na maioría dos casos, o acordo da adega cooperativa recolle nun documento formal o proceder habitual de cada cooperativa en cada vendima e posterior pago das uvas, incorporando as propias normas das D.O.de calidade que tamén regulan aspectos da vendima, dende hai moitos anos.
As cooperativas de horta galegas puxeron en marcha os acordos cooperativos recollendo as típicas, repetidas e xa moi axustadas normas de campaña.
En xeral, estes acordos foron implantándose na maioría das cooperativas de diferentes sectores.
Falta que os contratos terminen por axustarse e acomodarse aos sectores cárnicos, para o que será necesario facer un esforzo de diálogo e comprensión, de maneira que non sexa un mero paso burocrático e se convertan nunha ferramenta de estabilidade e valorización da produción agraria e gandeira que leve a que os custos de produción terminen por trasladarse ao seguinte elo da cadea alimentaria.
Os acordos foron implantándose na maioría das cooperativas de diferentes sectores, falta que terminen de axustarse aos sectores cárnicos.
Dende AGACA fixemos catro intensas xornadas coas cooperativas dos sectores vitivinícola, horta e flor, leite e subministración e vacún de carne. Agardamos ter acompañado ás cooperativas e contribuído para que a norma se aplique con normalidade en Galicia.
«Actuación financiada a través do Programa de Asistencia Técnica 2022 enmarcado dentro das actuacións do Convenio MAPA-Cooperativas Agro-alimentarias de España para o desenvolvemento de diversas actividades de mellora da competitividade e modernización das cooperativas agroalimentarias e a formación, igualdade e relevo xeracional en consellos reitores».
Higinio Mougán
director-xerente de AGACA.
 |
 |
