A Asociación Galega de Cooperativas Agroalimentarias (AGACA) celebrará o vindeiro 21 de outubro en Santiago de Compostela a xornada “Mulleres que cultivan futuro. Liderado, igualdade e cooperativismo agroalimentario”, que reunirá representantes do sector cooperativo, do ámbito xurídico e das administracións públicas para analizar o papel das mulleres no medio rural e os retos que aínda quedan por afrontar en materia de igualdade.
A iniciativa enmárcase no Ano Internacional da Agricultora 2026 e terá lugar no Hotel OCA Puerta del Camino, a partir das 10:30 horas.
A xornada afondará tanto na realidade cotiá das mulleres que desenvolven a súa actividade no sector agroalimentario como na súa presenza nos órganos de decisión das cooperativas. A través dun relatorio e de dúas mesas de debate, achegaranse experiencias concretas de mulleres vinculadas a cooperativas galegas e analizaranse tamén as ferramentas e políticas públicas que poden contribuír a avanzar cara a unha participación máis equilibrada.
O relatorio maxistral correrá a cargo da presidenta da Audiencia Provincial de Lugo, Sandra Mª Piñeiro: “As mans invisibles do campo: traballo feminino rural e recoñecemento xurídico. Como o dereito ve —ou deixa de ver— o traballo das mulleres no medio rural”.
O encontro permitirá ademais coñecer as experiencias de mulleres con responsabilidades e traxectorias diferentes dentro do cooperativismo agroalimentario galego, procedentes de CLUN, Viña Costeira, AIRA e HORSAL. A última parte da mañá estará dedicada ás políticas públicas para impulsar a igualdade efectiva nas cooperativas, coa participación de representantes das administracións estatal e autonómica.
Programa da xornada
10:30 h | Recepción de participantes e café de benvida
11:00 h | Apertura da xornada
Carmen Rodríguez, presidenta da Asociación Galega de Cooperativas Agroalimentarias (AGACA), e Darío Arufe, director da oficina de Cajamar Caja Rural S.C.C. en Santiago de Compostela.
11:15 h | Relatorio maxistral
As mans invisibles do campo: traballo feminino rural e recoñecemento xurídico. Como o dereito ve —ou deixa de ver— o traballo das mulleres no medio rural.
Intervén Sandra Mª Piñeiro, presidenta da Audiencia Provincial de Lugo. Presenta Mª Dolores Calvo, presidenta da Asociación Nós, As Mulleres e da cooperativa Condes de Albarei.
12:30 h | Mesa de experiencias: Mulleres referentes nas cooperativas agroalimentarias galegas
Participan Silvia Ces, socia de CLUN e representante de AGACA no Grupo de Traballo Xóvenes de Cooperativas Agro-alimentarias de España; Concepción Iglesias, vicepresidenta de Viña Costeira e presidenta do Consello Regulador da DO Ribeiro; Ana Corredoira, socia de AIRA e socia promotora da cooperativa de traballo asociado As Vacas da Ulloa; e Raquel Rodríguez, vicepresidenta de HORSAL.
Modera Ana Mª Freire, vicepresidenta de AGACA e vogal no consello reitor de AIRA.
13:30 h | Mesa coloquio: Políticas públicas para impulsar a igualdade efectiva nas cooperativas agroalimentarias
Participan: Susana Pérez, secretaria xeral de Emprego e Relacións Laborais; Mª Dolores Souto, Subdirectora Xeral da Xestión da PAC, Consellería do Medio Rural, y Carmen Martínez, responsable de Formación e Igualdad en Cooperativas Agro-alimentarias de España
Modera Carmen Rodríguez, presidenta de AGACA.
14:30 h | Clausura
Intervirán Carmen Rodríguez, presidenta de AGACA, e María José González, Conselleira do Medio Rural.
14:45 h | Actuación musical
Marcos Valcárcel.
A asistencia á xornada é gratuíta con inscrición previa.
Inscrición
Programa financiado polo Instituto das Mulleres, do Ministerio de Igualdade, e conta coa colaboración de Grupo Cajamar.
