O Ministerio vén de anunciar que amplía o prazo para solicitar unha estancia gratuíta, en calquera das explotacións de toda España adscritas ao programa, ata o 25 de agosto.
O programa CULTIVA22 vai dirixido a persoas incorporadas como responsables de explotación a partir do 1 de xaneiro de 2017 (tendo menos de 41 anos no momento da súa instalación). É totalmente gratuíto e financiado polo Ministerio de Agricultura, Pesca e Alimentación. Son estancias formativas de 5 a 14 días de duración en explotacións modelo de acollida situadas en toda España. Na web do Ministerio pode atoparse toda a información sobre o programa e na sede electrónica figuran un manual de instrucións e todo o necesario para solicitar praza.
Que destino escoller?
As estancias organízanse en colaboración con entidades de ámbito nacional representativas do sector agrario, entre as que tamén figura AGACA a través de Cooperativas Agro-alimentarias de España que, en colaboración coas súas Federacións e Unións territoriais, leva organizando estancias formativas nos dous últimos anos cunha experiencia moi positiva.
Nesta edición preséntanse 76 explotacións modelo de acollida de persoas socias de cooperativas, das cales 7 son galegas.
O catálogo de explotacións de Galicia pode consultarse nesta ligazón.
As explotacións vinculadas a cooperativas de toda España poden consultarse neste catálogo en formato PDF, onde aparecen clasificadas por Comunidade Autónoma e especifícase as datas en que cada unha está dispoñible para recibir. Non é posible viaxar dentro da propia comunidade, polo que o catálogo é unha boa ferramenta para planificar que explotación resulta máis adecuada.
Cooperativas Agro-alimentarias de Castela-A Mancha preparou un catálogo específico para as súas opcións, que pode consultarse nesta ligazón.
consultarse en este enlace.
Financiamento
A participación en Cultiva22 é de balde para as persoas que realizan estancias formativas.
É un Programa financiado polo MAPA, no marco da Orde do 5 de abril pola que se modifican os anexos II e IV do Real Decreto 425/2021, do 15 de xuño, polo que se establecen as bases reguladoras para a concesión de subvencións destinadas a organizar o Programa CULTIVA, relativo a estancias formativas en explotacións modelo e apróbase a súa convocatoria para o exercicio 2022.
.
