- O Centro da Rede Eusumo Fundación Terra de Trasancos (Narón) acolleu onte a estudantes do Colexio Plurilingüe San José, de Lugo.
- Participaron nunha charla informativa, impartida por técnicos da Asociación Galega de Cooperativas Agroalimentarias (AGACA) e percorreron as instalacións da Fundación.
- A actividade é parte da Rede Eusumo para o Fomento do Cooperativismo e a Economía Social.
Por primiera vez este curso celébrase unha das actividades para estudantes de Rede Eusumo e a Asociación Galega de Cooperativas Agroalimentarias (AGACA). O curso pasado participaron máis de 800 estudantes de 26 centros educativos.
Técnicos de AGACA impartiron onte na Fundación Terra de Trasancos (Narón) unha xornada didáctica sobre as vantaxes do cooperativismo como fórmula de emprendemento e de crecemento laboral e económico para un grupo de estudantes lucenses do Colexio Plurilingüe San José.
O obxectivo das actividades, enmarcadas nun “Taller de Emprendemento Cooperativo Eusumo”, é darlles a coñecer este modelo de negocio a mozos e mozas, para que o teñan en consideración ao finalizar os seus estudos.
Tras as charlas teóricas sobre cooperativismo, os estudantes visitaron as diferentes iniciativas de carácter socio-económico que desenvolve Terra de Trasancos, entre elas perruquería, ximnasio, cafetería e supermercado; tamén, as dedicadas a horta, para coñecer de primeira man o funcionamento dunha entidade destas caracterísiticas.
Fundación Terra de Trasancos é un dos 6 Centros de atención permanente da Rede Eusumo que actúa como punto de información e asesoramento presencial sobre cooperativismo para calquera que estea interesado en iniciar ou continuar desenvolvendo a súa actividade profesional baixo ese modelo de negocio.
Rede Eusumo
Asesoramento, orientación, formación, acompañamento nas iniciativas empresariais, apoio á internacionalización, celebración de encontros internacionais e transfronteirizos, intercambio comercial e cooperación transversal definen a rede transversal de colaboración Eusumo, nacida no 2011 co impulso da Consellería de Economía, Emprego e Industria.
