AGACA pon a disposición das cooperativas a posibilidade de realización de obradoiros dirixidos ás mulleres socias, coa finalidade principal de recoñecer, animar e apoiar a súa participación nestas entidades. Para iso, creamos espazos nos que tratamos temas de interese xeral para elas, utilizando metodoloxías que fomentan a participación e a relación entre as asistentes.
Estes obradoiros de “Apoderamento de mulleres socias de cooperativas” teñen unha duración de 15 horas lectivas e requiren da participación dun grupo de 20 mulleres.
En canto á temática, pode adaptarse ás necesidades da cooperativa. Con todo, propoñemos o seguinte:
– Presentación de AMCAE e de “Nós, As Mulleres”, asociacións de mulleres de cooperativas a nivel nacional e autonómico, respectivamente.
– Exposición de casos prácticos de posibles complementos da explotación, para aproveitar os recursos da contorna e incrementar a rendibilidade: cultivo de cogomelos, framboesa, arando, lúpulo e castaña, produción de leite ecolóxico, aproveitamento da resina de piñeiro, cría de galiña de Mos e porco celta etc.
– Viaxe técnica opcional, para coñecer experiencias relacionadas coas producións anteriores ou calquera outra visita de interese. Algunhas posibilidades son:
– Campoastur (Otur, Asturias): coñecer o servizo á explotacións “Máis que un respiro”.
– Centro Especial de Emprego Produtores de Carne da Ribeira Sacra.
– S.A.T. Casa Grande de Xanceda: Produción de iogures en ecolóxico.
– O Val/Fundación Terra de Trasancos: coñecer as actividades sociais que ofrece na contorna.
Estes obradoiros poden realizarse tanto en formato presencial como en aula virtual, utilizando a plataforma ZOOM.
Adaptámonos ás vosas preferencias e necesidades!
Para conseguir máis información é posible escribir a loli@agaca.coop ou chamar ao 981 58 47 83.
Esta actividade enmárcase na programación 2022 da Rede Eusumo. A Rede Eusumo é unha rede de colaboración impulsada pola Xunta de Galicia para o fomento do cooperativismo e a economía social, que conta con financiamento do Ministerio de Traballo e Economía Social.
