José Montes Pérez, reelixido como presidente de AGACA

• Montes repetirá no cargo outros catro anos máis.
• Redúcese o número de Consellos Sectoriais ao integrarse os subsectores de Horta, Flor e Apicultura.
• O Consello Reitor pasará de nove integrantes a oito.

AGACA celebrou hoxe en Santiago de Compostela a súa XXIX Asemblea Xeral, na que destaca a reelección de José Montes (tamén presidente de Feiraco), como presidente de AGACA e a redución no número de consellos sectoriais tras a integración do subsector de Froitas e Hortalizas co de Flor, Apicultura e Outros, conformando a Xunta Sectorial de Horta, Flor, Apicultura e Outros. Por outra banda, aprobáronse as contas anuais, o informe de xestión e a aplicación de resultados correspondente a 2016.

Completarán o Consello Reitor da Asociación: José Manuel López Tellado, da cooperativa Agris, como vicepresidente; Emilio Rodríguez Felipe, de Coren, repetirá como Secretario; Javier Iglesias Sendín, da cooperativa Viña Costeira, deixa de ser Vocal para asumir o cargo de Tesoureiro.

Como vogais seguirán: Rafael Tejeda, da cooperativa Proterga (vacún de carne) e Alberto Amil, da cooperativa hortícola Horsal; únese a eles na vogalía Dores Calvo Méndez, da cooperativa Condes de Albarei (vitivinícola).
A nova presidencia manifestou a súa intención de manter unha liña de continuidade nos seus esforzos por promover a integración das cooperativas e a concentración da oferta para mellorar a posición negociadora da oferta, buscando o reequilibrio da cadea agroalimentaria; ademais, expresou o propósito de apostar pola innovación e a cooperación con outras rexións e países co obxecto de potenciar o comercio exterior das cooperativas, defender a calidade e a imaxe da súa produción e difundir os valores cooperativos.

Seguirase a traballar tamén no seu coñecemento e difusión entre as persoas mozas, como exemplo de empresa competitiva, responsable socialmente e con grandes posibilidades de expansión.

Montes agradeceu o apoio obtido nesta elección e insistiu na necesidade de continuar fomentando o cooperativismo.

Consellos Sectoriais
Os integrantes dos Consellos Sectoriais adoitan significar unha representación dos distintos sectores produtivos podendo ampliarse, desdobrarse ou reducirse —respectando os máximos e mínimos—, segundo se acorde por decisión da Asemblea Xeral. Nesta ocasión, aprobouse un cambio nos estatutos ao proceder á integración dos subsectores de Froita e Horta con Flor e Apicultura, co obxecto de alcanzar unha representación más fiel á realidade sectorial ante calquera reunión ou negociación ante os distintos organismos ou institucións que proceda.

Como consecuencia da Asemblea, a configuración do Consello Reitor, máximo órgano de representación, queda da seguinte forma:

AGACA ten como misión a representación e a defensa dos intereses das 120 entidades socias de Galicia, que facturan preto dos 2.000 millóns de euros e dan emprego fixo a 7.000 traballadores agrupando a máis de 30.000 socios.

02/06/2017