- Esta mañá 30 estudantes do CFEA de Sergude participaron nunha xornada didáctica sobre cooperativismo na Fundación Feiraco, situada en Ames.
- A actividade, organizada pola Asociación Galega de Cooperativas Agroalimentarias (AGACA), forma parte da Rede Eusumo, para impulsar o cooperativismo e a economía social.
Unha trintena de estudantes do Centro de Formación e Experimentación Agroforestal de Sergude asistiu esta mañá a un obradoiro da Rede Eusumo acerca das características da economía social que tivo lugar na Fundación Feiraco (Ames).
Técnicos de AGACA destacaron, como calidades das cooperativas, a toma democrática de decisións e a distribución equitativa de beneficios, ademais da súa adaptabilidade a todo tipo de sectores. Explicaron tamén cal é o perfil da persoa emprendedora, así como oportunidades de negocio no medio rural.
O alumnado percorreu instalacións da planta de transformación e envasado de leite Feiraco para aprender os pormenores da elaboración dos produtos lácteos, así como o funcionamento da cooperativa.
Rede Eusumo
Esta actividade enmárcase no programa de actuación 2018 da Rede Eusumo. A Rede Eusumo é unha rede de colaboración impulsada pola Secretaría Xeral de Emprego da Xunta de Galicia para o fomento do cooperativismo e a economía social que conta co financiamento do Ministerio de Emprego e Seguridade Social.
