- Corenta e oito estudantes do CEIP Felipe de Castro (Noia) participaron na actividade “Almorz@ con Beizos Brancos”, que aconsella sobre almorzos saudables e mostra o proceso de transformación do leite.
- AGACA (Asociación Galega de Cooperativas Agroalimentarias) e Obra Social “la Caixa” organizan a iniciativa en centros educativos de toda Galicia.
O alumnado de carto de primaria do colexio Felipe de Castro, situado no lugar noiés de Bergondo, aprendeu esta mañá diferentes opcións para comezar a xornada cunha correcta achega enerxética e con alimentos saudables,naturais e procedentes maioritariamente do mercado nacional, fronte aos almorzos pouco variados ou baseados en produtos procesados industrialmente.
Entre os consellos ofrecidos pola nutricionista María Fernández, que impartiu a charla, atópase o consumo de zumes naturais como complemento pero non como substitutivo das froitas de tempada (pois a froita enteira achega máis enerxía e nutrientes que a espremida), o de produtos lácteos e, sobre todo, almorzar diariamente.
A modo de exemplo, o alumnado almorzou leite enteiro, froita e pan con aceite.
Ademais, mediante un xogo en grupo os estudantes aprenderon os pasos do proceso de transformación do leite, dende a granxa ata os fogares, e a importancia do sector no medio rural galego.
Compromiso social
Durante este curso académico (2017/2018) celebráronse xa 13 xornadas e repartíronse 560 almorzos no marco de “Almorz@ con Beizos Brancos”.
AGACA e Obra Social “la Caixa” poñen en marcha este programa dende 2015 para impulsar a correcta alimentación dos nenos e nenas e fomentar nos fogares hábitos alimentarios saudables, ademais de pór en valor os produtos do agro galego.
