Santiago de Compostela, 17 de febreiro de 2017.- Medio centenar de estudantes de terceiro e cuarto de primaria do CEIP A Cristina (Carballo) participou esta mañá en “Almorz@ con Beizos Brancos”, un programa organizado pola Asociación Galega de Cooperativas Agroalimentarias (AGACA) e Obra Social “la Caixa” que ten por obxectivo difundir fórmulas nutricionais sas entre os escolares de Galicia.
Escola e familia
O almorzo incide tanto no desenvolvemento físico como no rendemento académico: é unha das premisas que reforza “Almorz@ con Beizos Brancos”, para que nin nenos e nenas nin as súas familias se salten esa comida, posto que, segundo reflicten os resultados da pasada campaña deste programa, aínda quedan escolares que acoden a clase co estómago baleiro.
Así, a nutricionista María Fernández comezou a xornada explicando os valores nutricionais de froitas de tempada e produtos lácteos e recomendando evitar alimentos procesados industrialmente, con exceso de azucres que non achegan ningún beneficio á saúde.
Para ilustrar a charla o alumnado degustou un almorzo equilibrado e completo, composto por pan con aceite, froita e leite adozada con cacao puro e mel. Por outra banda, os nenos e nenas aprenderon os procesos que pasa o leite desde que se extrae das vacas ata que chega aos seus vasos mediante un xogo didáctico e repartiuse material divulgativo con diferentes propostas de almorzo e as súas calidades nutricionais.
Compromiso duradeiro
Tras o éxito de “Almorz@ con Beizos Brancos” no curso pasado, con 11 centros educativos (4 da provincia da Coruña, 4 de Pontevedra, 2 de Lugo e 2 de Ourense) e máis de 500 estudantes participando, AGACA e Obra Social “la Caixa” aumentaron este ano o número de actividades a 20.
