- Entregará 2.000€ ao IES Monte Neme de Carballo e 6.000€ máis aos Servizos Sociais de Laracha, Carballo e Ponteceso.
- A cooperativa valora especialmente a iniciativa solidaria do centro educativo fabricando máscaras de protección, e quere reforzar os recursos para os colectivos con menos recursos con doazóns aos Servizos Sociais dos concellos da zona.
A cooperativa de Bergantiños repartirá esta semana 8.000 euros do seu Fondo de Formación e Promoción Cooperativa entre o IES Monte Neme de Carballo e os centros sociais de Laracha, Carballo e Ponteceso.
A través desta iniciativa, Coreber quere premiar a sensibilidade demostrada polo alumnado e profesorado do centro educativo carballés, que fabricou pantallas protectoras contra a COVID-19 servíndose dos equipos de impresión en 3D dispoñibles no Instituto, dun xeito voluntario e altruísta para repartir entre os profesionais da zona máis expostos ao virus.
Por outra banda, o Consello Reitor, en representación da masa social da entidade decidiu colaborar con 6.000 euros, repartidos a partes iguais, entre os Servizos Sociais da comarca de Bergantiños (Laracha, Carballo e Ponteceso) co obxecto de contribuír á protección dos segmentos máis desfavorecidos da sociedade.
Dende o 22 de abril, a normativa, en forma de Real Decreto, permite destinar este Fondo a actividades que “axuden a frear a crise sanitaria da COVID-19 ou a paliar os seus efectos, mediante accións propias ou a través de doazóns”.
