- A adega Condes de Albarei (Cambados) acolleu esta mañá ao alumnado da EFA Fonteboa (Coristanco), que participou nun obradoiro “Divulgación do emprendemento de experiencias cooperativas como modelo de éxito”.
- A actividade forma parte da Rede Eusumo, promovida pola Secretaría Xeral de Emprego para impulsar a economía social e o cooperativismo como modelo de negocio de éxito.
A adega cooperativa Condes de Albarei recibíu esta mañá a 44 estudantes do Centro de Promoción Rural – EFA Fonteboa, como parte dun obradoiro de “Divulgación do emprendemento de experiencias cooperativas como modelo de éxito”, da Rede Eusumo, para aprender as características do cooperativismo como modelo de negocio con posibilidades de manterse con éxito no medio rural, en calquera rama produtiva ou de servizos.
Estes obradoiros impartidos por técnicos da Asociación Galega de Cooperativas Agroalimentarias (AGACA), destacan como valores positivos das cooperativas a toma democrática de decisións, a distribución equitativa de beneficios ou a diminución de riscos asociados ao emprendemento.
Condes de Albarei
Durante un percorrido polas instalacións do Pazo Baion persoal da adega explicou aos participantes, ademais de como se producen os viños, a súa traxectoria para manterse e medrar no mercado á par que as iniciativas que emprende para mellorar o entorno sociocultural.
Rede Eusumo
Estas actividades enmárcanse no programa de actuación 2019 da Rede Eusumo. A Rede Eusumo é unha rede de colaboración impulsada pola Secretaría Xeral de Emprego da Xunta de Galicia para o fomento do cooperativismo e a economía social que conta co financiamento do Ministerio de Emprego e Seguridade Social.
