- Esta mañá no CEIP Pío XII (Santiago) celebrouse a xornada “Almorz@ con Beizos Brancos” para destacar a importancia do almorzo e educar en nutrición sa.
- Cincuenta escolares de terceiro de primaria participaron na actividade, que incluíu unha charla e un xogo educativos e un almorzo completo.
- A Asociación Galega de Cooperativas Agroalimentarias (AGACA) e Obra Social “la Caixa” repartiron, desde o inicio deste curso académico, 390 almorzos saudables.
Esta mañá AGACA e Obra Social “la Caixa” difundiron hábitos alimentarios saudables entre 50 estudantes de terceiro de primaria do colexio compostelán Pío XII, que visitaron de novo co programa “Almorz@ con Beizos Brancos”, tras o éxito da primeira actividade o 28 de outubro.
A xornada comezou cunha charla educativa, guiada pola nutricionista María Fernández, con recomendacións como non substituír a froitas frescas por zumes, aínda que sexan naturais, dado o seu menor achegue nutritivo, e evitar os alimentos procesados industrialmente polo seu exceso de compoñentes, como azucres, sen valor nutricional real. Fernández axudou a nenos e nenas a discernir se os almorzos que toman a diario son saudables e ofreceulles alternativas.
A continuación, mediante un xogo, explicouse o proceso de produción e transformación do leite, para ilustrar a súa importancia alimentaria e tamén a súa relevancia para o medio rural.
Para terminar, os escolares degustaron leite adozada con cacao puro e mel, pan galego con aceite e froita, como exemplo de almorzo san e coa adecuada achega de nutrientes.
Responsabilidade
O compromiso de AGACA e Obra Social “la Caixa” coa alimentación concretouse o pasado curso con máis de 500 almorzos repartidos en Galicia. En 2016/2017 Obra Social “la Caixa” aumentou o orzamento desta actividade para chegar a máis colexios e, no que vai de curso, efectuáronse xa 8 xornadas.
