- Agris, Icos, Cogasar, Coelplan, Leira e Aira proxectan unirse nunha única cooperativa de primeiro grao.
- Os consellos reitores asinan un acordo de integración, pendente da ratificación da mesma polos socios nas respectivas asembleas, antes do 30 de xuño.
- A cifra de negocio alcanzaría os 93 millóns de euros. Aira sumaría máis de 220 empregados e agruparía a máis de 2.800 socios.
- O Plan de Negocio contempla un incremento superior ao 10% durante os tres primeiros anos, cun investimento anual de máis de 2 millóns de euros.
- Comeza agora un intenso período de reunións con socios e empregados.
Taboada (Lugo), 09 de xuño de 2017. Membros dos consellos reitores e principais directivos das cooperativas Agris, Icos, Cogasar, Coelplan e Leira, xunto coa cooperativa e fábrica de pensos, Aira, da que todos forman parte, acordaron onte promover a súa fusión nunha única cooperativa de primeiro grao que manterá o nome de Aira.
Durante as próximas xornadas, cada cooperativa manterá diversas reunións cos respectivos socios e empregados para informar cumpridamente e resolver todas as posibles dúbidas que poidan xurdir.
A decisión final dependerá, con todo, de que os socios ratifiquen a decisión durante o exercicio das respectivas Asembleas xerais, que terán lugar antes do 30 de xuño. De aprobarse, a entidade estaría preparada para comezar a súa operatividade o 1 de xaneiro de 2018.
Esta idea de integración nace hai algo máis dun ano, cando as cooperativas que integran Aira, conscientes de estar a desenvolver actividades e cumprindo obxectivos comúns, opta por realizar un estudo formal sobre a viabilidade económica dunha posible fusión entre elas. Os resultados foron tan elocuentes que a engrenaxe comezou a moverse nesa dirección ata lograr o compromiso asinado onte, de traballar nesa dirección a condición de que as respectivas Asembleas corroboren esta postura favorable.
Liñas estratéxicas
O obxectivo fundamental é valorizar a produción dos socios, apostando pola integración comercial e industrial láctea desenvolvendo unha oferta diferenciada e de valor engadido en leite desde o impulso á comercialización e transformación da produción dos socios.
Ademais, supoñerá un firme compromiso coa base social para reforzar a súa sensación de pertenza e propiedade da entidade, asegurando a proximidade a todos eles.
Por outra banda, garantirase a sustentabilidade do conxunto —a nivel social, comercial e financeiro—, mellorando a xestión e eficiencia, xerando e optimizando recursos e aproveitando sinerxías.
O impulso comercial será outra das grandes engrenaxes mediante un maior desenvolvemento da política e xestión comercial e de márketing; a creación dun ámbito específico de atención a socios e clientes; o incremento nas vendas de produtos de alimentación animal; a integración de servizos profesionais agrarios; a mellora na xestión da distribución (espazos comerciais -subministración de combustibles, transportes…); o incremento das vendas das subministracións agrogandeiras e a expansión dos servizos de valor engadido, á par dos agrarios.
Datos
Máis de 2.800 agricultores e gandeiros integrarán esta nova cooperativa cuxa persoal global superará os 220 empregados repartidos en 15 centros de traballo.
A produción de leite dos socios supera 310 millóns de litros anuais, repartidos entre 1.100 explotacións.
A nova Aira suma a fabricación de 200.000 toneladas de pensos e mesturas que distribúe a máis de 2.100 explotacións.
As vendas e servizos conxuntos arroxan unha cifra de negocio de 93 millóns de euros para os que a sociedade conta cuns activos de máis de 43 millóns de euros.
Plan de Negocio
O Plan de Negocio prevé —para os tres primeiros anos— un incremento, na cifra de negocio, superior ao 10% cun investimento anual de máis de 2 millóns de euros.
Actividades
As principais actividades desenvolvidas polas cooperativas están vinculadas aos subsectores gandeiros de leite e carne; as subministracións; os servizos de veterinaria, maquinaria, loxística, carburantes, de comercialización, asesoramento etc.
Influencia xeográfica
O contexto xeográfico implicado abarca as catro provincias galegas, con especial incidencia nas zonas centro e sur da provincia de Lugo e parte da noreste de Pontevedra.
Intercooperación
A intercooperación segue sendo un eixo fundamental na estratexia do grupo que continuará mantendo e ampliando a intercooperación co resto de cooperativas a través da súa participación nas entidades: Delagro, Dairylac, Ucoga, Daira Food, Artesáns Gandeiros, Acolat, etc.
