- Os venres do mes de xuño algunhas cooperativas galegas abrirán as súas portas para dar a coñecer o seu funcionamento. As catro socias de AGACA que abren son: o 2 de xuño, Clun; o 9 de xuño, Viña Costeira; o 16 de xuño, Horsal e o 23 de xuño, Aira.
- A iniciativa “Os venres cooperativos” pretende que o labor das cooperativas chegue ao gran público, vinculándoas ao desenvolvemento da súa contorna, da economía rural e da sociedade. Para iso, oito cooperativas mostrarán tanto o seu propio funcionamento como o modelo cooperativo de negocio.
A Consellería de Promoción do Emprego e Igualdade, a través da Rede de polos de apoio ao emprendemento e ao emprego, organiza a actividade co obxectivo de visibilizar a fórmula e os valores cooperativos a través de experiencias reais de cooperativas asentadas no noso territorio, á vez que se dan a coñecer as funcións dos polos de apoio ao emprendemento e ao emprego e favorécese a creación de redes de colaboración e empresa.
O día 2 de xuño a actividade será en Clun (Aldea Ponte Maceira s/n, Ames – A Coruña).
CLUN (Cooperativas Lácteas Unidas) nace coa vocación de ser referencia no sector agrogandeiro galego. Conta con 3.500 socios, a quen proporciona as subministracións e servizos integrais necesarios para a xestión eficiente das súas explotacións. Ademais, a súa división láctea centra a súa actividade na recollida, envasado e distribución de leite e outros derivados lácteos, baixo as marcas *Únicla, Clesa, Feiraco e Arquega.
Ademais de Clun poderase coñecer como funciona Casa do Maior.
Organiza: Polo Costa da Morte.
O 9 de xuño a actividade será en Viña Costeira (Valdepereira, S/n, 32415, Ribadavia – Ourense).
A adega, con máis de 50 anos de historia, se enmcarca na Denominación de Orixe Ribeiro. Enfócase en uso de tecnoloxías e know how en viticultura e enoloxía cos obxectivos de mellorar a sustentabilidade ambiental da contorna, reducir os tratamentos fitosanitarios do viñedo, asumir prácticas de cultivo de produción integrado, optimizar os custos do viticultor e mellorar a calidade dos procesos enolóxicos
Ademais, poderase coñecer Xeitura, que atende as tres principais áreas de actuación aceptadas na Xestión do Patrimonio: investigación, protección e difusión.
Organiza: Polo Miño Central.
O 16 de xuño a actividade será en Horsal (Lugar Pardiño, 10B, 36633 Vilariño, Pontevedra).
A cooperativa está dedicada á produción, manipulación e comercialización de froitas e hortalizas de Galicia.
Ademais, poderase coñecer Factoría Atelier, que recupera mobles e materiais en desuso para imprimirlles nova vida.
Organiza: Polo Pontevedra Norte e Rías Baixas.
O 23 de xuño a actividade será en Aira (Parque Empresarial s/n, 27550, Taboada – Lugo).
Aira conta coa maior fábrica de pensos para gando leiteiro que existe actualmente en España, cunha produción anual de 207.000 toneladas. Con todo, a actividade principal da cooperativa xira ao redor da produción de leite.
Ademais, poderase coñecer Milhulloa, que xunto con Granxa Maruxa constitúe Muulhulloa, unha entidade que se dedica á cosmética ecolóxica, natural e sostible.
Organiza: Polo Lugo Sur.
