NOTA DE PRENSA – DELAGRO S. Coop / Ucoga
- Delagro e UCOGA foron os impulsores desta iniciativa, cuxo obxectivo era recadar alimentos non perecedoiros e produtos de droguería de primeira necesidade para doalos ao Banco de Alimentos das Rías Altas.
- Ademais dos produtos que a título persoal achegaron os participantes, os organizadores doarán 10 litros de leite por cada persoa que participou no percorrido.
As inmediacións da cidade de Santiago de Compostela acolleron esta mañá unha acción solidaria impulsada pola cooperativa de segundo grao, Delagro, e a corretoría de seguros especializada no sector agroalimentario, UCOGA.
Durante aproximadamente 3 horas, preto de 300 persoas procedentes de diferentes lugares do Norte de España camiñaron por unha boa causa: recadar alimentos e produtos de hixiene de primeira necesidade para doalos ao Banco de Alimentos das Rías Altas, entidade que se ocupará de distribuílos entre as persoas e familias máis desfavorecidas da provincia.
O percorrido circular de 9 quilómetros comezou no pavillón multiusos Fontes do Sar e finalizou na Praza do Obradoiro, pasando polo Monte do Gozo. Concluída a marcha, os asistentes repuxeron forzas nun xantar tipo cóctel ofrecido no Hotel Monumento San Francisco.
O director xeral de Delagro, Carlos Castro, sinalou que “a andaina solidaria enmárcase dentro do compromiso que tanto Delagro como UCOGA mantemos coa sociedade. Por esta razón, ademais dos alimentos que xenerosamente achegaron as persoas que participaron nesta iniciativa, nós doaremos 10 litros de leite por cada asistente, é dicir, 3.000 litros”, afirma.
“A elección deste produto non é casual”, explica pola súa banda Iván Novo, director xeral de Ucoga, “e non só pretende contribuír a mitigar as necesidades de familias en risco de exclusión social, especialmente daquelas integradas por nenos, cun alimento tan básico e necesario como o leite, senón tamén reforzar o vínculo de ambas as empresas cun sector produtivo clave na nosa contorna: o lácteo”.
O mundo cooperativo, de gran arraigamento e influencia en Galicia, volveu a demostrar con esta resposta masiva o seu desexo de contribuír a mitigar as desigualdades que se producen na súa contorna máis inmediata, tanto con accións individuais como apoiando iniciativas como esta, de maior calado e alcance.
Sobre Delagro
Delagro é unha cooperativa de segundo grao integrada, á súa vez, por máis de 26 cooperativas e entidades, algunhas delas de segundo grao, de Asturias, Cantabria e Galicia que, xuntas, achegan máis de 46 cooperativas representadas, con máis de 26.000 familias asociadas, das que 17.000 son socios con actividade agraria.
O seu radio de acción esténdese polo Norte de España e o seu ámbito de incidencia abarca a contorna agrogandeira, desde a comercialización e elaboración de produtos ata un amplo abanico de servizos capaz de dar solución a calquera necesidade que poida expor o cliente.
Sobre UCOGA
UCOGA é unha corretoría de seguros especializada no sector agroalimentario, cuxa actividade se desprega principalmente na contorna cooperativa do noroeste de España. Fundada no ano 2013, na actualidade xestiona 14 millóns de euros en primas, conta con máis de 8.000 clientes, atende 14.000 sinistros cada ano e asegurou 100.000 cabezas de gando.
Coincidindo co quinto aniversario da súa apertura, UCOGA acaba de ser galardoada pola Fundación Inade co Premio Galicia Segura á Mediación de Seguros, distinción que non recaía nunha corretoría galega desde hai unha década.
08/09/2018
