- A Asociación Galega de Cooperativas Agroalimentarias (AGACA) e Obra Social “la Caixa” desenvolveron esta mañá na cooperativa Agris a iniciativa “Coidar, coidarte” para contribuír ao envellecemento activo.
- Na anterior convocatoria do programa tomaron parte máis de 70 persoas en 4 cooperativas.
Unha trintena de persoas socias da cooperativa Agris participou esta mañá en Lugo na iniciativa “Coidar, coidarte”. A primeira parte da mañá constou dunha charla sobre a situación das persoas maiores no medio rural e o papel das cooperativas na mellora da súa calidade de vida así como a das persoas encargadas da súa atención, a cargo da técnica de AGACA Ruth Rodríguez.
A continuación, Marisol Suárez e Silvia Fondo, profesionais en atención a persoas maiores e con dependencia explicaron diferentes modos de mitigar a deterioración asociada ao envellecemento, a nivel físico, psicolóxico e social, para que tanto as persoas maiores como as que estean encargadas da súa atención gocen dun maior benestar no día a día.
Laura Lema, responsable de Negocio Agrario de CaixaBank en Galicia, Maribel Barreiro, membro do equipo directivo de Agris e Higinio Mougán, director-xerente de AGACA participaron na inauguración e clausura da xornada.
Compromiso social
“Coidar, coidarte” organizouse para atender ás demandas directas de formación sobre atención a maiores recibidas durante o programa de empoderamento para mulleres socias de cooperativas “Atrévete Contigo Mesma” tamén desenvolvido por AGACA e Obra Social “la Caixa”.
Neste ciclo de “Coidar, coidarte” prevese realizar accións en 8 cooperativas.
