- A presidenta de AGACA, Carmen Rodríguez, xunto co seu director xerente, Carlos Ares, e o seu adxunto a Presidencia e Consello Reitor, Higinio Mougán, reuniuse onte co director xeral da PAC e o Control da Cadea Alimentaria, Juan José Cerviño, para trasladar as inquedanzas das cooperativas ante cambios que se presentan debidos a novidades na Política Agraria Común (PAC) e a situación dos mercados actuais.
Así, en relación coa PAC, AGACA expresou que a eliminación das axudas á agroindustria cooperativa supón un claro prexuízo para estas entidades. Doutra banda, as cooperativas vitivinícolas están preocupadas polo debate aberto sobre as modificacións na redución do rendemento da D.O. Rías Baixas. En canto ás cooperativas lácteas, a renegociación dos contratos lácteos e o seu posible impacto nas explotacións foi outro dos temas tratados na reunión.
Ademais, o encontro serviu para determinar obxectivos comúns entre a Asociación e a Dirección Xeral en defensa das cooperativas e a súa base social.
