- ABANCA e AGACA renovan o seu acuerdo de colaboración durante a feira ABANCA Semana Verde de Galicia.
Durante o grande encontro agrogandeiro do noroeste peninsular, a feira ABANCA Semana Verde de Galicia, AGACA e ABANCA reuníronse para renovar unha vez máis o convenio de colaboración en materia financeira. O director de ABANCA Agro, Jesús Combarro, foi o encargado de renovar o texto, con Carlos Ares, director-xerente de Agaca.
O acordo renovado este ano pon o acento especialmente na sustentabilidade a través do financiamento. Para iso, o banco habilita produtos especificamente deseñados para acometer os importantes investimentos que requiren a adopción de enerxías renovables, a implantación de melloras encamiñadas a reducir o consumo de electricidade ou auga ou a adquisición de maquinaria e vehículos que ofrezan menores consumos ou o tratamento e valorización de residuos.
Un amplo catálogo para calquera fin
O novo texto mantén, respecto a anteriores rúbricas, a ampla oferta do banco para o segmento. Unha das propostas ao dispor dos asociados de Agaca é a Liña de Financiamento Agro Multidestino mediante a que os clientes poden unificar nun único contrato o financiamento do día a día das súas explotacións agrogandeiras. En concreto, permite dispoñer de fondos para anticipar as axudas da PAC, para facer fronte aos gastos das campañas agrícolas e gandeiras e para financiar as primas de seguros agrarios contratados en ABANCA. O cliente dispón ao seu ritmo dos fondos, algo que pode ofrecer un aforro de custos, pero tamén simplifica os trámites administrativos.
Alén doutras fórmulas de financiamento habituais, tanto para investimentos como para os gastos do día a día, o novo acordo impulsado por ABANCA tamén dá entrada aos convenios oficiais co IGAPE, con diferentes SGR nacionais, coa Sociedade Anónima Estatal de Caución Agraria (SAECA) ou co ICO.
Un apoio incondicional ao sector
A firma entre ABANCA e AGACA chega durante a 48ª edición da feira ABANCA Semana Verde de Galicia, do 4 ao 7 de xuño no recinto da Feira Internacional de Galicia ABANCA en Silleda. A entidade financeira reivindica un ano máis o seu «compromiso co evento e tamén co recinto feiral silledense». A unidade especializada ABANCA Agro foi presentada nesta mesma feira en 2015.
Máis de dez anos despois, ABANCA Agro «é unha realidade consolidada e superou con fartura os retos que se expuña», afirman desde a entidade.
