AGACA publicou unha Guía de boas prácticas para integrar os Obxectivos de Desenvolvemento Sostible nas cooperativas agrarias de Galicia (pode consultarse pinchando nesta ligazón) co fin de inspirar e acompañar ás cooperativas na súa contribución a estes puntos. A iniciativa enmárcase nos traballos de Asistencia Técnica para o Ministerio de Agricultura, Pesca e Alimentación e Cooperativas Agro-alimentarias de España.
O éxito da iniciativa global de referencia na contribución ao desenvolvemento sostible, a Axenda 2030 e os seus 17 Obxectivos de Desenvolvemento Sostible (ODS), depende de que logremos aterrar estes retos e as súas solucións no ámbito local. O sector agroalimentario é un piar estratéxico para un futuro sostible.
A consecución do ODS 2: Fame cero, depende do éxito das empresas conciliando modelos de produción e consumo responsable coa produtividade necesaria para dar resposta a un subministro seguro e saudable, asegurando o avance no ODS 8: Traballo decente e crecemento económico. O impacto e a dependencia do sector dos recursos naturais o converten nun aliado fundamental nos ODS 12: Produción e consumo responsable, 13: Acción polo clima ou 15: Vida de ecosistemas terrestres. As ramificacións das actividades agrarias abranguen os 17 ODS, e precisamente no 1: Alianzas para acadar os obxectivos, as cooperativas poden xogar un papel central.
As cooperativas agrarias afrontan os ODS dende unha posición vantaxosa
As cooperativas agrarias afrontan estes retos dende unha posición vantaxosa, pola propia natureza do modelo cooperativo e a súa longa experiencia colaborando como rede de soporte e xerando valor no territorio e na comunidade. Como empresas do sector agroalimentario, esta é tamén unha posición moi exposta tanto ás consecuencias da degradación dos recursos naturais como ás esixencias do mercado, da normativa e
da opinión pública.
Por iso, ante a cantidade de ruído arredor da sostibilidade e a urxencia de retos irresolubles sen a acción do sector agrario, coma o cambio climático ou a perda da biodiversidade, é importante atopar recursos rigorosos e áxiles que permitan orientar ás cooperativas neste camiño de contribución aos ODS.
Con este espírito desenvolveuse a «Guía de buenas prácticas para la integración de los ODS en las cooperativas agrarias de Galicia», un documento que recompila ideas clave, boas prácticas e unha batería de propostas de accións para inspirar e acompañar ás cooperativas galegas, independentemente do seu tamaño, actividade e grao na integración da sostibilidade.
A guía comeza introducindo o desenvolvemento sostible no sector agrario e o marco dos ODS. Despois, tomando como fío condutor os 17 ODS, presenta unha serie de boas prácticas reais recollidas de entrevistas con 8 cooperativas galegas e outras accións complementarias. É inspirador coñecer como empresas do territorio innovan e impulsan proxectos que transforman a contorna e a comunidade, con iniciativas que poden replicarse noutras organizacións, adaptándoas á súa realidade.
O futuro da competitividade do sector agrario está ligado á transición sostible. O tecido de cooperativas, sometidas a moitos retos e esixencias, pon no mercado produtos de alta calidade, que combinan innovación e tradición, a través dun modelo colaborativo, inclusivo e competitivo. É o momento de reinterpretar os retos como oportunidades, transformándoas en fontes de diferenciación para que as cooperativas se posicionen e se visibilicen como os axentes transformadores que son.
