- A Asociación Galega de Cooperativas Agroalimentarias (AGACA) e Obra Social “la Caixa” organizan este martes, coa cooperativa Coreber, a xornada “Coidar, coidarte” para fomentar o envellecemento activo e mostrar como mellorar a atención a maiores dependentes.
- É a cuarta deste ciclo de xornadas que se levarán a cabo en cooperativas de toda Galicia.
Persoas socias da cooperativa láctea Coreber participarán o día 12 de xullo na charla “Coidar, coidarte” impartida por expertas en envellecemento e atención a persoas maiores e con dependencia.
A xornada informará sobre os diferentes procesos físicos e psicolóxicos asociados co envellecemento e achegará pautas para tratar de mitigar o deterioro asociado a cumprir anos.
Ademais, explicaranse técnicas e manobras prácticas para a atención no fogar de persoas maiores dependentes, tratando de mellorar o seu benestar á vez que facilitando o labor das persoas coidadoras.
Compromiso social
“Coidar, coidarte” responde ás demandas efectuadas polas cooperativistas que interviñeron en accións previas desenvolvidas por AGACA e Obra Social “la Caixa”, entidades que reafirman deste xeito o seu compromiso co medio rural galego, contribuíndo ao seu avance social.
Lugar: Hotel Punta del Este, Avda. Malpica, 125, Carballo — (A Coruña)
Horario: Martes, 12 de xullo, de 11:00 a 15:00 h.
