- O ForoESGal celebrará, o vindeiro 15 de outubro no Hotel Puerta del Camino de Santiago de Compostela, a sexta edición dos Cafés con Aroma a Economía Social, unha proposta que ten entre os seus obxectivos reforzar a identidade da economía social, analizar novos valores como vantaxe competitiva e promover accións para o desenvolvemento do sector en Galicia.
Desta volta, o programa, dirixido ao persoal directivo e responsables de entidades do sector, artellarase baixo o título “A economía social ante o novo escenario xeopolítico internacional”, o que permitirá abordar a situación actual así como os principais retos e desafíos para o sector.
Intervirán para iso con voces expertas como a de Miguel Otero, investigador principal no Real Instituto Elcano e profesor e director na IE University, encargado do relatorio-marco que abrirá o programa trala benvida institucional por parte do presidente do ForoESGal, Mino Martínez.
A benvida institucional contará así mesmo coas intervencións de Manuel Varela, presidente de Caixa Rural Galega, patrocinador un ano máis do evento; e de Goretti Sanmartín, alcaldesa do Concello de Santiago.
A continuación, o propio Otero intervirá nunha mesa redonda acompañado por Carlos Lozano, coordinador da Área de Relacións Internacionais da Confederación Empresarial Española de la Economía Social (CEPES) e de Celso Gándara, representante de ForoESGal en CEPES. A vicepresidenta 2ª do Foro, Ana Olveira, actuará como moderadora.
O acto de clausura correrá a cargo de Susana Pérez Iglesias, secretaria xeral de Emprego e Relacións Laborais da Consellería de Emprego, Comercio e Emigración, que colabora no evento.
Será, como é habitual, unha xornada pensada para promover o diálogo aberto, enriquecedor e diverso sobre un sector que ten un papel protagonista como motor de creación de emprego de calidade, cohesión social e xeración de riqueza.
