- Fíxose balance da actividade desenvolvida en 2022 e informouse sobre o Plan de Actividades previsto para 2023.
- Os datos sectoriais reflicten moitas caras diferentes, incluso de mes en mes.
- Tamén se presentou o programa SAVES da Universidade de Vigo.
- Ao remate da Asemblea tivo lugar a Asemblea da Economía Social Galega.
AGACA celebrou esta mañá, en Santiago de Compostela, a 35 edición da súa Asemblea Xeral onde, con total normalidade, se aprobaron as Contas Anuais e o Informe de Xestión; presentouse a Memoria Anual de Actividades onde se reflicten as actividades desenvolvidas pola Asociación ao longo de 2022 e informouse sobre o Plan Anual de Actividades previsto para 2023.
En termos xerais, a realidade do exercicio 2022 na agrogandería e nas cooperativas agrarias galegas foi moi poliédrica, con moitas caras diferentes, incluso incluso contrarias segundo os meses. Os datos económicos foron elevados, cun aumento da facturación media dun 25% con respecto ao exercicio anterior pero tamén cun incremento dos gastos moi elevado que ofrece resultados heteroxéneos para as distintas cooperativas.
De cara a 2023, entre as actividades xerais previstas pola Asociación destacan as relacionadas coa necesidade de seguir impulsando as enerxías renovables, a remuda xeracional, facilitar o fluxo de traballadores para o agro e a gandería, a redución do impacto medioambiental ou o impulso á igualdade de xénero, ademais das cuestións vinculadas aos distintos subsectores.
Por último, María José Cabaleiro, profesora da Universidade de Vigo, presentou o Sistema de Asistencia Virtual para o Cooperativismo e a Economía Social, SAVES, desenvolvido pola UVigo xunto con AGACA, formulado co fin de identificar as necesidades de información das cooperativas agrarias galegas e deseñar conxuntamente informes específicos que permitan mostrar a situación das cooperativas agrarias galegas e a evolución do cooperativismo galego. Desenvólvese no marco da Rede Eusumo
unha rede de colaboración impulsada pola Dirección Xeral de Emprego, Traballo Autónomo e Economía Social da Consellería de Promoción do Emprego e Igualdade para o fomento do cooperativismo e a economía social que conta co financiamento do Ministerio de Traballo e Economía Social.
De seguido, as distintas entidades que conforman o Foro pola Economía Social Galega (AGACA, ESPAZOCOOP, CEGASAL, AESGAL e AEIGA ) desenvolvemos a Asemblea da Economía Social Galega cuxa clausura correu a cargo da conselleira de Promoción do Emprego e Igualdade, Mª Jesús Lorenzana.
