O obxectivo desta iniciativa é ofrecer novas oportunidades de impulso para emprendedores e empresas nos campos da industria agroalimentaria, forestal, marisqueira e pesqueira ou outros sectores relacionados co anterior, que desenvolvan a súa actividade en Galicia.
Este ano, co obxectivo de adaptarse ás novas necesidades e demandas do sector, a Fundación Juana de Vega ampliou o programa acollendo a PEMES de maior tamaño que necesiten algunha reestruturación, e a empresas que contribúan a poñer en valor os recursos do territorio. Para darlle cabida, estructuran o programa en 2 modalidades:
- EMPRENDEMENTO (creación de novas empresas):que ten por obxectivo axudar aos emprendedores a desenvolver as súas ideas de negocio, convertelas en proxectos de negocio e materializalas en empresas reais, innovadoras e competitivas.
- CRECEMENTO E CONSOLIDACIÓN (desenvolvemento de empresas existentes):que ten por obxectivo axudar ás empresas existentes (autónomos, MicroPEMES e PEMES) a desenvolver e/ou consolidar os seus proxectos empresariais tratando de mellorar o seu funcionamento mediante a titorización na toma de decisións en todas as áreas do negocio.
Os emprendedores e empresas interesadas terán ata o 30 de novembro para presentar as súas propostas. A inscrición para participar no proceso de selección está dispoñible na web: programa.juanadevega.org.
