- A Asociación Galega de Cooperativas Agroalimentarias (AGACA) realizou esta mañá o taller “Almorzos Cooperativos” co alumnado do CEIP Santa María do Castro (Cabo de Cruz).
- A actividade enmárcase na Rede Eusumo.
Estudantes de terceiro e cuarto de primaria do colexio Santa María do Castro, en Cabo de Cruz (Boiro), participaron esta mañá nun dos obradoiros do ciclo “Almorzos Cooperativos”, que promove a alimentación sa e dá visibilidade ao rol das cooperativas na produción alimentaria. Preto de 400 escolares de toda Galicia participaron no ciclo este ano.
Durante a actividade María Fernández, nutricionista, recomendou opcións para almorzar saudable e variadamente, como limitar os alimentos procesados e os zumes -mesmo os naturais- en favor de produtos coma froitas de tempada e lácteos. Tamén animou ao alumnado a cociñar e probar novos sabores, ofrecendo combinacións equilibradas de alimentos cos que preparar torradas.
Como exemplo realizouse unha degustación de leite, mandarinas e pan con aceite.
O concepto de cooperativismo explicouse mediante xogos deseñados para promover a colaboración entre participantes, así como mediante un cómic que recibiu cada estudante.
Microrrelatos
Por outra parte, AGACA e Rede Eusumo promoven concurso de microrrelatos dirixido a escolares de segundo ciclo de primaria. O seu obxectivo é fomentar a escritura e o interese polo cooperativismo e pola produción de alimentos, a agricultura e o medio rural. Os centros educativos públicos de Galicia interesados en participar poden consultar as bases aquí ou chamando ao 981 584 783.
Rede Eusumo
Esta actividade se enmárcase no programa de actuación 2019-2020 da Rede Eusumo. A Rede Eusumo é unha rede de colaboración impulsada pola Secretaría Xeral de Emprego da Xunta de Galicia para o fomento do cooperativismo e a economía social que conta co financiamento do Ministerio de Traballo, Migracións e Seguridade Social.
