- Estudantes do compostelán CEIP Raíña Fabiola participaron esta mañá na primeira das 20 xornadas previstas no programa “Almorz@ con Beizos Brancos” para este curso.
- Aprenderon sobre o proceso de produción do leite e sobre alimentación sa mediante unha charla e un almorzo equilibrado e con produtos naturais.
Medio centenar de estudantes de terceiro e cuarto curso de primaria do colexio Raíña Fabiola (Santiago de Compostela) inauguraron a nova campaña “Almorz@ con Beizos Brancos”, un programa organizado pola Asociación Galega de Cooperativas Agroalimentarias e Obra Social “la Caixa” para promover fórmulas nutricionais sas entre os escolares.
Escola e familia
Os escolares probaron un almorzo composto por pan galego con aceite, froita e leite, para reforzar o aprendido nunha charla impartida pola nutricionista María Fernández.
Fernández destacou a necesidade de comezar o día cun almorzo completo que achegue suficiente enerxía para medrar sans e render no colexio, evitando produtos industriais polo seu alto contido en azucres e graxas saturadas pouco saudables.
Xunto á vertente nutricional, nenos e nenas aprenderon os procesos que pasa o leite que consumimos mediante un xogo colaborativo e a importancia que o sector lácteo e as cooperativas teñen para a sociedade galega, da man de José Severino Montes, presidente de AGACA.
AGACA e Obra Social “la Caixa” pretenden que a iniciativa se estenda a toda a familia polo que, ademais, se repartiu material divulgativo sobre o ciclo de vida lácteo e sobre valores nutricionais e propostas de alimentos sans e fáciles de preparar para un almorzo saudable no fogar.
