- Esta tarde comezou o obradoiro “Apoderamento de mulleres socias de cooperativas” onde participan socias da adega Condes de Albarei.
- Susana López, secretaria xeral de Igualdade, participou na primeira das xornadas.
A Asociación Galega de Cooperativas Agroalimentarias organiza na adega Condes de Albarei o obradoiro “Apoderamento das mulleres socias de cooperativas”, que comezou esta tarde na sede da cooperativa en Cambados.
Unha vintena de socias da entidade participaron na primeira das catro sesións, que tivo como tema central a intelixencia emocional e o seu desenvolvemento.
Susana López Abella interveu no acto inaugural destacando que, segundo datos do Ministerio de Agricultura, Pesca e Alimentación, a situación da muller no rural é discriminatoria fronte á do home aspectos coma o salarial, onde ocupan na súa maioría rangos menores nas retribucións, ou a xerarquía, como por exemplo nos consellos reitores das cooperativas onde son maioría os homes: “A maternidade non pode ser unha rémora para o desenvolvemento profesional da muller“.
Pola súa banda, Dores Calvo, presidenta da cooperativa, remarcou que Condes de Albarei conta co mesmo número de homes que de mulleres nos cargos de responsabilidade dos departamentos e destacou os obxectivos do obradoiro: “É bo que participemos todos porque o apoderamento, a corresponsabilidade e a igualdade temos que conseguilos xuntos traballando”.
O taller continúa con sesións sobre o estrés, as súas consecuencias e como mellorar a autoestima e o autocontrol, o día 11; psicoloxía positiva e o seu papel na saúde mental, o día 18, e risoterapia, o día 25. A psicóloga clínica EmmaBlanco imparte as clases.
Esta actividade enmárcase no programa de actuación 2022 da Rede Eusumo. A Rede Eusumo é unha rede de colaboración impulsada pola Secretaría Xeral de Emprego da Xunta de Galicia para o fomento do cooperativismo e a economía social que conta co financiamento do Ministerio de Trabajo y Economía Social.
