- A Rede Eusumo para o fomento da economía social promove o estudo Aforro e eficiencia enerxética nas adegas cooperativas, desenvolvido por AGACA, para tratar de optimizar o aforro enerxético e os custos destas entidades.
O consumo enerxético é un dos custos aos que toda empresa e toda cooperativa deben facer fronte. Atopar o modo de reducir consumos e lograr a eficiencia enerxética tradúcese no aforro de custos, co conseguinte aumento da vantaxe competitiva e cunha diferenciación no mercado. Aínda máis, o consumo enerxético eficiente é unha das claves da estratexia para loitar contra o cambio climático.
Dende hai anos, AGACA vén analizando o consumo enerxético no proceso produtivo das adegas cooperativas a través do estudo dos seus hábitos de consumo e dos equipos que utilizan recursos enerxéticos.
A partir dos resultados obtidos, propóñense e recoméndanse accións idóneas para optimizar o consumo nas adegas, en función do seu potencial de aforro, da facilidade de implantación e dos custos de execución.
Froito dese traballo é o estudo Aforro e análise da eficiencia enerxética nas adegas cooperativas, dirixido especialmente ás adegas cooperativas para formalas na aplicación de medidas de aforro e eficiencia enerxética no seu proceso produtivo. Así pois, os obxectivos do estudo son:
-Fomentar que as adegas cooperativas adopten mecanismos que favorezan o aforro enerxético nos procesos produtivos, establecendo indicadores e medidas que permitan analizar os resultados e fixar obxectivos de mellora.
-Facilitar que as adegas cooperativas poidan comparar os seus consumos cos datos medios obtidos para establecer pautas de actuación co fin de reducir o consumo en función dos parámetros que se indican o informe.
Rede Eusumo
Esta actividade enmárcase no programa de actuación 2018 da Rede Eusumo. A Rede Eusumo é unha rede de colaboración impulsada pola Secretaría Xeral de Emprego da Xunta de Galicia para o fomento do cooperativismo e a economía social que conta con financiamento do Ministerio de Emprego e Seguridade Social.
