- Esta mañá desenvolveuse en Santiago de Compostela, a Xornada “Cambio climático e sustentabilidade das cooperativas”.
- Participaron representantes de cooperativas, produtores, industria, distribución e administración.
- Carmen Rodríguez, presidenta de AGACA reafirma o compromiso adquirido polo sector produtor, cooperativas e agroindustria para contribuír de forma positiva e construtiva á redución das emisións de gases de efecto invernadoiro.
- Hai un acordo unánime no sector en continuar implicándose na sostibilidade medioambiental sen ter que chegar a sacrificar a viabilidade económica.
Organizada pola Asociación Galega de Cooperativas Agroalimentarias (AGACA) co apoio económico da Rede Eusumo, esta mañá desenvolveuse, no Hotel Puerta del Camino, en Santiago de Compostela, a Xornada “Cambio climático e sustentabilidade das cooperativas” onde medio cento de representantes de cooperativas, produtores, industria, distribución e administración debateron sobre os retos actuais e inminentes para o sector agroalimentario.
Juan Sagarna, director de Sostenibilidad, Calidad e Innovación, de Cooperativas Agro-alimentarias de España —clarificando as normas e tendencias en sostibilidade na produción agraria e gandeira na Unión Europea, clave para as cooperativas e o sector—, apelou á necesidade de “lograr unha colaboración multilateral entre produtores, provedores, industria e distribución xa que o sector agroalimentario está no punto de mira”.
Como unha opción de complemento económico ás rendas agrogandeiras sumado ao compromiso co medioambiente, o CEO e fundador de AirCO2, Máximo Sánchez, puxo en valor a captura do carbono da masa forestal privada e a súa comercialización a través do mercado voluntario de créditos de carbono, un mercado sobre o que Jacobo Aboal, director da Agencia Gallega de la Industria Forestal-XERA, animando a ser proactivos e anticiparse a unha posible obriga normativa.
Sergio García, responsable da área de Calidade e I+D+i de AGACA expuxo os puntos clave en materia de redución de pegada de carbono e mellora do benestar animal detectados polo equipo técnico da Asociación, logo de máis de 600 visitas a 208 explotacións gandeiras de diversos puntos de Galicia desenvolvidas dende xaneiro a setembro.
Jorge Eiroa y Ricardo Castro, directivos de Vegalsa-Eroski, avanzaron os compromisos e intereses da entidade en materia de sostibilidade compatibilizando os reclamos das persoas consumidoras e as accións medioambientais a adoptar polos diferentes elos que interveñen na cadea alimentaria, como unha acción que debería ir en paralelo.
Jacobo Aboal (XERA); Daniel Ferreiro, director general de AIRA; Jorge Eiroa e Ricardo Castro (Vegalsa-Eroski); Juan Sagarna (Cooperativas Agro-alimentarias de España) e Sergio García (AGACA)
participaron nunha mesa redonda onde se destacaron puntos como a conveniencia de incorporarse ao mercado voluntario de créditos de carbono ou a necesidade de acadar certificacións de bo manexo e requisitos medioambientais para resultar transparentes e competitivos.
Neste senso, concluíuse que as cooperativas son a ferramenta idónea para acadar a totalidade dos obxectivos que se poidan formular dende a Unión Europea dado que pechan o círculo da cadea alimentaria, dende á produción á venda, e dominan os sistemas máis axeitados.
O acto de clausura correu a cargo de Carmen Rodríguez, presidenta de AGACA, quen mantivo o compromiso adquirido polo sector produtor, cooperativas e agroindustria para contribuír de forma positiva e construtiva á redución das emisións de gases de efecto invernadoiro da agricultura e da gandería: “Non coñecemos entre os produtores de alimentos propostas contrarias a esta idea e tampouco ninguén pode negar a contribución que todos facemos á economía rural. O noso medio segue sendo agrario, gandeiro e forestal e facemos grandes achegas á economía de Galicia”.
Por último, Farrah Lisa Megazi, subdirectora xeral da Economía Social destacou o peso das cooperativas agroalimentarias no ámbito da economía social e reiterou o compromiso da Xunta de Galicia con esta fórmula empresarial.
……………………………………………………………………………..
Esta actividade enmárcase no programa de actuación 2023-2024 da Rede Eusumo. A Rede Eusumo é unha rede de colaboración impulsada pola Secretaría Xeral de Apoio ao Emprego, Traballo Autónomo e Economía Social da Consellería de Promoción do Emprego e Igualdade para o fomento do cooperativismo e a economía social que conta co financiamento do Ministerio de Trabajo y Economía Social.
