NOTA DE PRENSA: Asoporcel
- A tese foi presentada na Facultade de Veterinaria de Lugo por Iván Manuel Rodríguez Paz, o seu percorrido pola evolución da raza Porco Celta desde os inicios da súa recuperación ata a actualidade fixo que acadara a cualificación de sobresaínte cum laude.
A Facultade de Veterinaria de Lugo acolleu o pasado venres 30 de outubro a presentación da tese doutoral “Características produtivas da canal e da carne na raza autóctona porcina Celta” de Iván Manuel Rodríguez Paz, veterinario e director técnico da Asociación de Criadores da Raza Porcina Celta (Asoporcel). O tribunal cualificou o traballo de sobresaínte cum laude.
A importancia da xenética
A tese constata que nos inicios desta recuperación levouse a cabo unha avaliación da información de pedigree da raza que permitiu coñecer a variabilidade xenética e a consanguinidade existentes, asunto de relevante importancia dado o reducido número de exemplares a partir dos que se iniciou a recuperación da raza.
Neste asunto quedou patente a relevancia que ten a existencia do Libro Xenealóxico e a importancia da boa xestión do mesmo, xa que é unha ferramenta básica para identificar e rexistrar a todos os animais, relacionalos cos seus ascendentes e descendentes e valoralos segundo as súas características raciais. Ademais, permite dirixir os cruzamentos entre os exemplares coas menores porcentaxes de parentesco, cuestión fundamental para asegurar o crecemento dos rabaños.
O autor da tese, Iván Rodríguez, sinala que “é imprescindible traballar no aumento dos censos de animais e das ganderías que se dedican á súa cría para garantirlle a supervivencia como raza” e que “as granxas de Porco Celta teñen que resultar sostibles e rendibles por si mesmas, cuestión na que xoga un papel importante a fase última de comercialización da carne e produtos derivados”.
Rendibilidade das granxas
A xestión da alimentación dos animais representa un dos maiores custos na produción das granxas, repercute nos tempos de cebado e nas características nutricionais e organolépticas das carnes que se obteñen.
Está a ser obxecto de estudo en numerosos traballos de investigación, desenvolvemento e innovación, cos que se busca determinar a calidade da canal e das carnes ás que o Porco Celta dá lugar, así como analizar a influencia nos produtos finais de diferentes factores como a idade de sacrificio e o sistema de explotación en réxime extensivo.
“Outro dos aspectos que define a optimización da produción é a implantación dunhas boas prácticas sanitarias, de hixiene e profilaxe”, afirma Rodríguez.
Produtos da raza e bondades socioeconómicas
Indica Iván Rodríguez: “É unha vantaxe que o porco sexa un referente de excelencia gastronómica en Galicia, onde tradicionalmente dá lugar a numerosos e moi variados preparados que, como non podía ser doutro xeito, tamén existen da raza Porco Celta, xa tipificados tamén nalgún estudo anterior”.
A caracterización comercial da raza, segundo sinala outra das conclusións da tese, vén dada polo asentamento, a partir do ano 2016, da marca de calidade 100 % Raza Autóctona Porco Celta que ampara os produtos desta raza nos espazos comerciais, garantindo a orixe e a trazabilidade, ao tempo que aporta unha imaxe recoñecible e inequívoca para o consumidor, cara ao que van dirixidas numerosas accións de difusión e promoción coa intención de fomentar o coñecemento da raza e a demanda da súa carne.
Rodríguez afirma: “O binomio Porco Celta-monte galego vén achegar solucións socioeconómicas e medioambientais para o noso entorno, xa que é unha actividade económica viable nas zonas xeográficas máis desfavorecidas, nas que combate o despoboamento rural e crea emprego, mentres axuda ao mantemento da paisaxe característica e prevén dos incendios forestais”.
“Non son poucas as razóns para traballar no mantemento e crecemento desta raza autóctona”, conclúe.
Nota completa: https://www.asoporcel.es/gl/blog/2020/11/02/el-autoctono-porco-celta-protagoniza-una-tesis-doctoral/
