-
Máis de 80 estudantes do IES Pedras Rubias asistiron esta mañá a unha charla sobre consumo responsable de alimentos, para celebrar o Día Mundial dos Dereitos do Consumidor, organizada pola Asociación Galega de Cooperativas Agroalimentarias (Agaca).
O alumnado de primeiro da ESO do instituto Pedras Rubias (Salceda de Caselas) recibiu esta mañá unha charla acerca dos valores nutricionais de diferentes alimentos, así coma os falsos mitos que rodean algúns deles.
A nutricionista María Fernández tamén explicou aos máis de 80 estudantes como interpretar a información nutricional e os listados de ingredientes das etiquetas, para distinguir cales conteñen menos azucres, graxas e compoñentes non beneficiosos para a saúde.
Ademais, prestou atención ás mensaxes que transmiten as campañas de marketing de varios alimentos, destacando que a linguaxe publicitaria pode ser ambigua e non sempre corresponder coas propiedades reais dos produtos que anuncia.
Para finalizar, o alumnado degustou un almorzo saudable composto por leite, pan con aceite e froita
.
