AGACA desenvolveu ao longo dos primeiros meses de 2025 varios cursos de Operario de granxa en distintas cooperativas de Galicia, formando a un total de 170 persoas.
As accións formativas tiveron lugar en Piensos Albores, ACO, O Rodo e Perpetuo Socorro, en modalidades presencial e teleformación. En todos os cursos participaron un total de 72 mulleres e 98 homes.
O programa afondou en contidos fundamentais para a mellora das explotacións gandeiras. Incluíu a análise da produción bovina —morfología e fisioloxía do gando, alimentación, sistemas de aloxamento e comportamento animal—, así como aspectos de sanidade animal, hixiene e bioseguridade, incidindo na prevención de enfermidades e zoonoses, na vixilancia sanitaria e na interacción entre saúde animal, saúde humana e benestar. Ademais, tratouse o manexo en diferentes etapas produtivas (post-cubrición, preparto, parto, destete, fase de cebo e ordeño), a xestión ambiental e a loita contra o cambio climático mediante a correcta xestión de estercos, compostos nitroxenados, emisións e consumos.
O curso completouse con formación sobre rexistro e documentación obrigatoria, así como a normativa vixente a nivel europeo, nacional e autonómico.
Estes cursos pertencen ao Plan de Apoio ao Fortalecemento e Consolidación das Cooperativas Agroalimentarias Galegas. Este plan de apoio, á súa vez, enmárcase no Programa de Emprego, Formación, Educación e Economía Socia, EFESO, cofinanciado polo Fondo Social Europeo Plus para o período 2021-2027, e na Convocatoria para a cofinanciación por parte do Fondo Social Europeo Plus de proxectos destinados a apoiar o crecemento, fortalecemento e consolidación de entidades e empresas da economía social, especialmente cooperativas, sociedades laborais, confrarías de pescadores ou mutualidades de previsión social, xestionada pola Confederación Empresarial Española da Economía Social (CEPES), na súa calidade de organismo intermedio.
