- A cooperativa de segundo grao DELAGRO, con presenza en Asturias, Cantabria e Galicia, celebrou a súa Asemblea Xeral de socios para presentar os resultados positivos do Plan Estratéxico que termina este ano.
- Cun volume de negocio superior a 154 millóns de euros, a entidade pechou 2016 cun beneficio neto distribuído aos socios de 0,94 millóns de euros.
A cooperativa de segundo grao, DELAGRO S. COOP. celebrou, onte martes, 4 de abril, a décimo quinta edición da súa Asemblea Xeral.
A Asemblea, que contou cunha participación do 70% de asociados e case un 90% de votos, porcentaxe de participación sen precedentes, viu aprobados por unanimidade o informe de xestión e as contas anuais correspondentes a 2016, así como a renovación do Consello Reitor, que sufriu unha única variación. Entra ao Consello a cooperativa Xallas, representada por Juan Manuel Miramontes, e abandónao José Ramalleira, representante de CLUN, para evitar que a entidade conte con dous representantes en Delagro.
Evolución eficiente
Carlos Castro, director xeral de Delagro, destacou o positivo progreso da cooperativa ao finalizar o Plan Estratéxico trienal 2014-2017, que permitiu “garantir o crecemento, eficiencia, rendibilidade e sustentabilidade financeira nunhas condicións moi competitivas, que serviron de referente aos socios”.
O beneficio neto distribuído en 2016 entre os socios ascendeu a 0,94 millóns de euros, mentres que o volume de negocio xestionado pola entidade chega a 154 millóns de euros.
Delagro logrou perfeccionarse en áreas como a transferencia de información grazas ao éxito de sistemas e estratexias de comunicación externa e interna, como foros técnicos para persoal e modelos de reporting. Como novidade neste sentido consolidouse un sistema CRM de xestión de información comercial (customer relationship management), que facilita a recollida, procesado e traslado dun alto volume de datos, para adaptarse ás esixencias do consumidor.
En canto a TIC, Delagro continúa implantando os seus softwares propios de xestión nas súas cooperativas socias (especialmente DELAGROS e MANDOS, xa plenamente integrados en tres cooperativas ). As entidades usuarias transmiten un alto grao de satisfacción.
Produción e Comercio
Sobresaen os resultados do Centro Multidisciplinar para a produción, envasado e distribución de fertilizantes funcionando desde 2015 nas Pontes. En 2016 descenderon entre un 20 e un 25% nos custos de almacenamento, procesamento e envasado de Delagro grazas á capacidade industrial e perfeccionamento loxístico logrados nas Pontes. Durante a Asemblea, Castro destacou que o Centro “funciona como un reloxo suízo, sendo un referente a nivel europeo en calidade de procesos e servizo”.
En paralelo, a actividade comercial incrementouse, tanto mediante a rede Mercarural de agrotiendas e supermercados como a través da mellora nas relacións cos clientes e a política comercial de Delagro. En 2016 a entidade desenvolveu novos plans de acción comercial, potenciando as vendas por volume e a venda cruzada, ampliou e diversificou provedores e captou novas distribucións.
Presente e futuro
En total, Delagro finalizaba 2016 con 96 delegacións comerciais, un conglomerado social formado por 30 socios e 53 cooperativas, 1.025 membros de persoal e unha cifra de negocio que supera os 480 millóns de euros.
A aspiración económica do Plan Operativo Anual 2017, ratificado pola Asemblea, é alcanzar un beneficio neto de 1,68 millóns de euros
