A banca cooperativa Cajamar asinou onte un convenio coa Asociación Galega de Mulleres de Cooperativas Agroalimentarias, Nós, As Mulleres, para ofrecer ás súas afiliadas produtos e servizos financeiros en condicións vantaxosas. Deste xeito, Cajamar mostra o seu compromiso co apoio á participación e o desenvolvemento social das mulleres nas cooperativas agroalimentarias galegas e coa mellora da competitividade nas entidades das que son socias.
Así, a maior caixa rural española colabora con esta asociación cuxo obxectivo é favorecer a consecución e o fomento dos principios de igualdade de trato e de oportunidades entre mulleres e homes, aumentando a presenza de mulleres en postos de responsabilidade e toma de decisións, así como dar visibilidade á muller empresaria, directiva, profesional e traballadora en todos os ámbitos económicos e sociais do movemento asociativo agrario e do mundo rural no seu conxunto.
Cajamar pon ao seu dispor produtos con condicións preferentes, entre os que se atopan distintos tipos de contas, hipotecas, tarxetas, produtos de financiamento, medios de pago, fondos de investimento e seguros, para o desenvolvemento dos seus negocios e proxectos profesionais. Así mesmo, tamén se desenvolverán diversas accións de transferencia de coñecemento, divulgación e fomento sectorial, como a organización de viaxes técnicas para visitar cooperativas de referencia noutras comunidades autónomas; a participación en programas de formación en gobernanza, liderado e habilidades dixitais; o apoio técnico para a xestión de axudas públicas e a creación de redes de solidariedade e intercambio profesional entre cooperativas e a realización de estudos sobre a situación das mulleres rurais, entre outras.
A presidenta da Asociación Galega de Mulleres de Cooperativas Agroalimentarias, María Dolores Calvo, e o director territorial de Cajamar en Galicia, José Antonio Benavides, foron os encargados de rubricar este acordo.
