Reunión entre cooperativas agroalimentarias gallegas e Ángeles Vázquez
As cooperativas, dispostas a traballar polo fortalecemento do sector con propostas concretas
- A nivel Estado: transparencia, cumprimento do Acordo Lácteo, retirada de leite sobrante, industrialización, volumes, control do leite en po e un Plan de Axuda Humanitaria para comercializar excedentes.
- A nivel cooperativas: información puntual da situación real das cooperativas, demanda de solucións polos baixos prezos, compromiso de traballar pola unidade das cooperativas leiteiras galegas.
Representantes dunha trintena de cooperativas vinculadas ao sector leiteiro en Galicia mantiveron, o venres 11 de marzo, unha reunión coa conselleira do Medio Rural, Ánxeles Vázquez e coa directora xeral de Gandería, Agricultura e Industrias Agroalimentarias, Belén do Campo, nas instalacións de AGACA, en Santiago. Conselleira e directora escoitaron activamente as achegas e propostas manifestadas trasladando a súa vontade de telas presentes no artellamento do Plan de Fortalecemento do Sector Lácteo.
Unha das primeiras mensaxes transmitidas atinxe directamente á capacidade de acción das Administracións. Non nos cansamos de repetir que é indispensable esixir o cumprimento integral do Acordo Lácteo, aprobando o correspondente Contrato Homologado entre primeiros compradores e industria e publicando no BOE, O Real Decreto de cesión de prezos para poder introducir a obrigada transparencia no sector.
Debería efectuarse unha actuación pedagóxica unánime por parte de todos os implicados, trasladando aos gandeiros unha mensaxe conxunta en favor de axustar a produción á demanda. Aclarar a realidade evidenciando que non se trata de ningunha estratexia de baixada de prezos senón de manter unha produción máis ordenada.
Ten que calar tamén a gravidade que supón para a supervivencia do sector leiteiro galego, a inexistencia dunha industria transformadora. Urxe establecer un Plan de Industrialización ligando produción e transformación
Non se entende que as Administracións ignoren as accións dos gobernos doutros países como é o caso de Italia que exerce un control sobre as importacións de leite. España debería activar mecanismos de retirada de leite sobrante do mercado e de control de entrada de derivados lácteos a prezos de ruína, como vén sucedendo co queixo e tamén, mecanismos de vixilancia e control do leite que vai a prezo de leite en po, para que sexa realmente destinado a este uso sen desviarse cara a outros produtos ou derivados lácteos. Hai que esixir a trazabilidade do leite en po, sen demora, como se esixe noutros sectores.
Coma sempre, a volubilidade dos prezos condiciona ao máximo a traxectoria do sector. As cooperativas primeiro compradoras son unhas das grandes prexudicadas: un 15% do leite destas cooperativas véndese a prezos ínfimos e as perspectivas non son favorables para os seus gandeiros, que se senten desprotexidos. A tendencia dos mercados indica claramente que o consumo dos lácteos non é ascendente.
Mantemos o noso compromiso de manter informada á Administración da situación puntual das cooperativas e de participar na elaboración do Plan de Fortalecemento do Sector Lácteo auspiciado pola Xunta e defendemos a elaboración dun Plan de Axuda Humanitaria tendo en conta que o leite é un alimento básico, clave na nutrición da poboación infantil e xuvenil de países en vía de desenvolvemento.
