- É un proxecto integrado por 14 países europeos, que agrupa o 60% da produción europea de leite de vacún.
- Financiado polo programa Horizonte 2020, da UE, establecerá liñas de comunicación e cooperación entre gandeiros europeos de gando bovino de leite.
O Centro de Investigacións Agrarias de Mabegondo (Mabegondo- A Coruña) acolleu esta mañá a xornada de presentación do proxecto EuroDairy en Galicia. Trátase dunha rede na que participan 20 entidades de 14países, concibida para aumentar a sostibilidade económica, social e medioambiental da produción leiteira en Europa. A participación española concrétase coa implicación de AGACA e o Instituto Vasco de Investigación e Desenvolvemeto Agrario Neiker-Tecnalia.
A presentación, a cargo de técnicos de Ingacal (Instituto Galego de Calidade Alimentaria), Ligal (Laboratorio Interprofesional Galego de Análise do Leite) e AGACA (Asociación Galega de Cooperativas Agroalimentarias) estivo precedida dunha mesa redonda na que se expuxeron estratexias para a produción e a comercialización do sector leiteiro galego ante o novo escenario normativo e de mercado.
Mesa redonda
Fernando de Antonio, técnico de Gandería de Cooperativas Agro-alimentarias de España, comezou a xornada explicando a influencia das normativas e regulacións europeas e nacionais na evolución do sector e amosou as propostas de Cooperativas Agro-alimentarias de España, como “aumentar as funcións das Organizacións de Produtores (OP) xa que a definición da Comisión Europea coincide amplamente co que actualmente fan as cooperativas”. Tamén, “pensar na posibilidade de que os compradores lácteos negocien coas OP, non cos seus membros, para favorecer a negociación colectiva, que non funciona pois as negociacións materialízanse en contratos, que non se firman entre as OP e a industria”. Asegurou que “aínda que en teoría se sabe o que a industria paga aos produtores e a distribución á industria, hai arredor dun 20% de prezo do leite que ninguén coñece”.
A continuación, Edelmiro López, profesor da Universidade de Santiago (USC), centrouse no mercado e as súas tendencias contraditorias “que veñen para quedar”. Dunha banda, indicou, “o maior volume de demanda é para marcas brancas e produtos de baixo prezo, o que parece ligarse á desigualdade social española, onde se dilúe a clase media consumidora de produtos marquistas. Doutra, multiplícanse certos nichos de mercados para produtos moi concretos coma ecolóxicos ou saudables”.
Para mellorar a situación do sector, recomendou: “Reorientar as explotacións cara modelos autónomos, non dependentes de alimento ou materias externas, para evitar ligarse á volatilidade dos seus prezos”. Como vantaxe adicional, engadiu que “ a autonomía achegará ás granxas ás melloras ambientais que a longo prazo poderían facilitar o cobro de axudas, dado o fincapé da Comisión Europea neste aspecto”.
Francisco Sineiro, profesor da Escola Politécnica Superior da USC, sinalou como xeitos de lograr o obxectivo de autonomía das granxas “o aumento de terras dispoñibles e a mellora de forraxes pois dous de cada tres silos teñen calidade deficiente”. A nivel de xestión de granxas, afirmou: “Deberíanse aprobar plans de mellora con criterios racionais en función da capacidade financeira para afrontar débedas”. Finalmente, sinalou que “os índices de referencia de prezos deberían estar baseados no mercado, non no propio prezo pagado polo leite”.
EuroDairy
No proxecto EuroDairy, que rematará a principios de 2019, participan 14 países: Reino Unido, Países Baixos, Suecia, Bélxica, Dinamarca, Finlandia, Francia, Alemaña, Irlanda, Italia, Polonia, Portugal, Eslovenia e España, englobando o 40% dos produtores de leite, o 45% das vacas e o 60% da produción de leite europea.
AGACA coordina o paquete de traballo “Rede de granxas piloto innovadoras”, no que a nivel global participarán 120 explotacións. En Galicia elixíronse 10, de distintos sistemas de produción. Trátase de buscar un conxunto común de metodoloxías e métodos estandarizados de traballo, polo que todas as granxas seguirán os mesmos indicadores de avaliación en catro temas prioritarios: eficiencia de recursos, biodiversidade, coidado animal e indicadores económicos. A rede permitirá establecer grupos operativos cos que conectar as granxas piloto para compartir coñecementos e experiencis, estimulando a innovación.
César Resch, investigador do Instituto Galego da Calidade Alimentaria (INGACAL) explicou que EuroDairy aborda a pegada de carbono “dende unha perspectiva holística: non rompe a explotación en unidades senón que todos os procesos se relacionan e polo tanto todos inflúen na emisión de CO2 ou gases equivalentes”.
EuroDairy centrarase, entre outras, en cuestións de manexo de gando e xurros para efectuar melloras en canto a emisiós pois, segundo Resch, “a marxe das cuestións medio ambientais, as explotacións capaces de emitir menos CO2 por litro de leite son máis eficientes en todos os aspectos”.
Roberto Lorenzana, presidente do Laboratorio Interprofesional de Análise do Leite (Ligal) indicou que EuroDairy busca “xerar coñecemento para obter explotacións resilientes mediante o estudo e a comparación dos resultados das granxas tanto coa súa propia produtividade como coa doutras explotacións que partan de situación similares”. A análise dos datos permitirá ver a incidencia das diferentes prácticas na rendibilidade e sostibilidade no tempo das explotacións, identificando cales son as mellores prácticas de xeito que se poidan compartir para aplicar a máis ganderías.
EuroDairy fomentará o emprego e difusión da innovación baseada na práctica na produción leiteira, enfocada a cuestións clave de sostibilidade despois da abolición das cotas leiteiras, como a resiliencia socieconómica, a eficiencia dos recursos e a produción, con obxectivos de biodiversidade, adaptando e desenvolvendo solucións implementables a través da rede.
02/02/2017
