- Esta mañá arrincou en Valencia o I Congreso de Xuventude Cooperativista, un evento de carácter europeo que reúne a máis de 300 persoas vinculadas co cooperativismo agroalimentario.
- A Asociación Galega de Cooperativas Agroalimentarias ( AGACA) acode ao evento cun grupo de 9 cooperativistas entre os 18 e so 38 anos.
Hoxe celébrase a primeira das dúas xornadas do I Congreso de Xuventude Cooperativista, en Valencia, dedicada a un Foro Empresarial para Mozos e Mozas Cooperativistas da COGECA, organización representativa a nivel europeo das cooperativas agroalimentarias, xunto con mesas redondas e relatorios acerca das necesidades das persoas novas no sector ou o papel das cooperativas na mellora das súas condicións.
Participan nesta cita internacional delegacións de Alemaña, Bélxica, Estonia, Finlandia, Francia, Polonia, Suecia, Irlanda ou Italia, ademais de España, país no que se centra a xornada de mañá: o I Encontro Estatal de Mozos e Mozas Cooperativistas de Cooperativas Agro-alimentarias de España.
Por parte de Galicia, AGACA reuniu a un grupo de nove persoas, con idades comprendidas entre os 18 e os 38 anos, procedentes dos sectores lácteo, hortícola e apícola.
Ao longo de dous días, este encontro busca o intercambio de puntos de vista sobre os retos vinculados á agricultura do mañá e o papel das cooperativas agroalimentarias, fomentando o diálogo sobre como mellorar a representación dos novos agricultores na base social e nos órganos de goberno destas entidades.
Entre outros temas, mediante grupos de traballo, relatorios e mesas redondas, expoñeranse boas prácticas en cooperativas europeas, modos de facilitar o relevo xeracional e o acompañamento aos novos agricultores nos seus proxectos profesionais, instrumentos para frear o abandono de terras, Política Agraria Común e Plan nacional de Desenvolvemento Rural ou dixitalización
