- Manuel Suárez, co relato “A miña vida no campo”, obtivo o primeiro premio desta primeira edición na categoría de 3º de Primaria.
- Un cheque de 500 euros para o colexio, e unha tableta electrónica e un lote de libros para o alumno gañador do certame foron os premios entregados.
- O Concurso foi convocado no marco do programa “Almorz@ con Beizos Brancos”, impulsado pola Asociación Galega de Cooperativas Agroalimentarias (AGACA) e Obra Social “la Caixa” para fomentar a nutrición sa.
Esta mañá tivo lugar a entrega de premios do Concurso Pequenos Relatos AGACA no colexio cambadés CEIP do Castrelo, convocado pola Asociación Galega de Cooperativas Agroalimentarias e Obra Social “la Caixa”.
O alumno Manuel Suárez, co relato titulado “A miña vida no campo”, resultou vencedor na categoría de 3º de Primaria. Recibiu como premio unha tableta e un lote de 5 libros. O colexio, pola súa banda, recibiu un cheque por valor de 500 euros.
O I Concurso de Pequenos Relatos AGACA foi convocado este curso académico no marco do programa sobre nutrición sa “Almorz@ con Beizos Brancos”. O certame busca fomentar a imaxinación dos nenos e nenas e atraer a súa mirada cara ao mundo rural, a agricultura e a gandería.
O director- xerente de AGACA, Higinio Mougán, xunto cun representante de CaixaBank, participaron na entrega. Valoraron positivamente a participación do estudante no certame e destacaron a importancia de que os escolares sexan conscientes da importancia do mundo rural para Galicia.
A colaboración entre Obra Social “la Caixa” e AGACA remóntase a 2015 e inclúe outras iniciativas destinadas a resolver necesidades específicas doutros colectivos como son o empoderamento da muller cooperativista, a mellora da atención a persoas maiores no fogar ou a incorporación de persoas mozas á actividade profesional no mundo rural.
