- Esta mañá celebrouse na cooperativa láctea Cobideza (Cercio, Lalín) unha xornada sobre empoderamento para as mulleres socias da cooperativa.
- A xornada forma parte de “Atrévete Contigo Mesma”, programa impulsado por .Obra Social “la Caixa” e AGACA dende 2015.
“Atrévete Contigo Mesma” diríxese a mulleres que viven na contorna rural, especialmente aquelas vinculadas a algunha cooperativa, para conciencialas tanto das súas propias capacidades como da importancia de que tomen cargos nos órganos de decisión das entidades.
A xornada comezou co relatorio “O papel da muller nas cooperativas agroalimentarias”, que mostrou o contraste entre a alta porcentaxe de mulleres asociadas —conforman o 49% da masa social— e a súa escasa implicación as actividades cotiás e os órganos de xestión das entidades: nos consellos reitores hai un 12% de mulleres, ademais de analizar as causa dese desaxustes.
A continuación, a Coach e técnica de AGACA Loli Couso liderou unha sesión de coaching con actividades en grupo onde se abriu un espazo para a reflexión sobre as aptitudes que as mulleres integrantes das cooperativas posúen, co obxectivo de darlles visibilidade e facer que elas mesmas as identifiquen e valoren.
Tamén se buscaron xeitos de eliminar os posibles obstáculos que as impiden tomar roles máis activos, como poden ser xeitos de lograr a conciliación entre a vida familiar e a profesional, ou os servizos e accións que as cooperativas poden adoptar para facilitar a paridade.
Interviñeron na xornada José Manuel Hermida, vicepresidente de Cobideza, Higinio Mougán, director-xerente de AGACA, José Manuel López, director da Área de Negocio Agro Galicia de CaixaBank e Víctor Barreiro, director da Oficina de Lalín de CaixaBank.
Compromiso coa igualdade
“Atrévete Contigo Mesma” forma parte do “Plan de acción en favor da infancia, mocidade, muller e maiores 2016- 2017” desenvolvido por AGACA e Obra Social “la Caixa”, quen aumentou o orzamento destinado ás distintas accións sociais (alimentación infantil, envellecemento activo e coidado de persoas maiores, incorporación de mozas ao sector agrogandeiro en réxime cooperativo) para alcanzar a máis persoas beneficiarias.
