- A propiedade, situada en Vilanova de Arousa, alberga o maior proxecto enoturístico desenvolvido en Galicia.
A adega Pazo Baión foi distinguida co premio ao “Mejor Rincón o Paisaje Enoturístico” nos III Premios de Enoturismo Rutas del Vino de España. O xurado do certame describe a propiedade Pazo Baión como “unha das paisaxes máis espectaculares do panorama vitivinícola mundial”. Así mesmo resaltaron o valor histórico da leira ao albergar edificios tan emblemáticos como “a adega centenaria, o pazo do século XV, o hórreo, a vacariza e o pombal”.
A leira Pazo Baión, situada no corazón do Val do Salnés, foi adquirida pola adega Condes de Albarei no ano 2008 co obxectivo de elaborar viños de pago e de explotar o potencial enoturístico da propiedade. Abriu as súas portas ao público no ano 2011, tras tres anos de intensa rehabilitación dirixida polo arquitecto galego César Portela, converténdose no maior proxecto enoturístico desenvolvido en Galicia. Dentro dos seus 6 séculos de historia e das súas 30 hectáreas atopámonos cunha leira de gran beleza paisaxística e arquitectónica que garda viñedos. Coas súas uvas elabórase o Albariño Pazo Baión, caracterizado polas singularidades da propiedade así como pola súa crianza de seis meses sobre as súas finas leas.
Ao longo dos seus oito anos de vida, Pazo Baión foi distinguido como o Mellor Proxecto Empresarial e o seu libro “Proxecto enoturísico Pazo Baión” recibiu o premio Gourmand 2013 como o mellor libro do mundo na categoría de “libro do viño para profesionais”.
