- As adegas cooperativas españolas conseguiron 1 Gran Bacchus de Oro, 20 Bacchus de Oro e 44 Bacchus de Plata neste concurso internacional.
- Varias cooperativas galegas obtiveron premios.
O Concurso Internacional de Viños que organiza a Unión Española de Catadores (UEC), Bacchus 2016, tivo lugar do 17 ao 21 de marzo no Casino de Madrid, na que supón a súa décimo cuarta edición.
O certame, considerado un dos máis importantes do noso país, recoñecido pola Organización Internacional da Viña e o Viño (OIV), pola Federación Mundial de Grandes Concursos Internacionales de Viños e Licores (VINOFED) e polo Ministerio de Agricultura, Alimentación e Medio Ambiente, supuxo un gran éxito para os viños cooperativos españois -mesmo para viños procedentes de cooperativas doutros países, como Portugal e Brasil-.
En total, os viños cooperativos españois conseguiron 1 Gran Bacchus de Oro, 20 Bacchus de Oro e 44 Bacchus de Plata.
Obtiveron galardóns varias das adegas asociadas a AGACA:
– Martín Códax (Bacchus de Oro por CEO)
– Eidosela (2 Bacchus de Plata, por Eidosela e por Arbastrum)
– Condes de Albarei (Bacchus de Plata por Salneval)
Durante catro xornadas, 80 catadores profesionais entre Masters of Sommelier, Masters of Wine, enólogos, prensa especializada e prescritores nacionais e internacionais, valoraron en catas a cegas os 1.854 viños presentados a concurso, chegados de todo o mundo, dando a coñecer cales foron os galardoados coas medallas Gran Bacchus de Oro (viños con puntuación 93-100), Bacchus de Oro (88-93) e Bacchus de Plata (84-88).
Carpe Diem Trasañejo, Gran Bacchus de Oro
Nesta edición de 2016, sólo 13 viños obtiveron o máximo galardón Gran Bacchus de Oro, 7 deles españois. Entre eles, cabe destacar o Carpe Diem Trasañejo, elaborado pola cooperativa Virgen de la Oliva de Mollina (Málaga) pertencente ao Grupo Dcoop.
Listado completo de premiados (PDF) na páxina web de Unión Española de Catadores.
