O Grupo Operativo SUPRAOLIVO celebrará o vindeiro 24 de setembro en Santiago de Compostela a súa xornada de presentación, na que dará a coñecer os obxectivos e as principais liñas de traballo dun proxecto orientado a impulsar un cultivo da oliveira máis sostible, adaptado e competitivo en Galicia, Castela e León e Andalucía.
A xornada terá lugar no Hotel OCA Puerta del Camino, con posibilidade de asistencia presencial ou en liña. A recepción das persoas participantes comezará ás 09:30 horas e a inauguración, prevista para as 10:00 horas, correrá a cargo de María José Gómez, conselleira do Medio Rural da Xunta de Galicia. A participación é gratuíta e require inscrición previa. As prazas presenciais son limitadas.
Variedades autóctonas, calidade do aceite e sustentabilidade
Ás 10:30 horas, Carlos Ares, director-xerente de AGACA, presentará SUPRAOLIVO e os seus principais ámbitos de actuación.
O proxecto estudará a adaptación agronómica de variedades autóctonas de oliveira, a caracterización físico-química e sensorial dos aceites e a sustentabilidade e rendibilidade do cultivo, poñendo en común o coñecemento e a experiencia de tres territorios con condicións produtivas diferentes: Galicia, Castela e León e Andalucía.
SUPRAOLIVO busca así xerar coñecemento aplicable ao sector e avanzar en solucións que permitan aproveitar os recursos locais e as posibilidades que ofrece o cultivo da oliveira en diferentes condicións agronómicas.
As posibilidades do cultivo da oliveira en terras ácidas, a debate
O programa continuará ás 13:00 horas coa mesa redonda «O cultivo da oliveira en terras ácidas: dificultades, solucións e posibilidades», que permitirá trasladar o debate á experiencia práctica de profesionais directamente vinculados ao sector.
Participarán Jesús Ángel Blanco, xerente de Soleae; Xoán Couto, presidente de PROLIGAL S. Coop. Galega, e Juan Manuel Luque, director de Luque Ecológico S.L. A mesa estará moderada por Lucio García, doutor enxeñeiro agrónomo do Centro Tecnolóxico da Carne.
A clausura, prevista para as 14:15 horas, contará con Carmen Rodríguez, presidenta de AGACA, e Martín Alemparte, director da Axencia Galega da Calidade Alimentaria (AGACAL).
A continuación celebrarase un showcooking e xantar networking, cunha demostración culinaria en directo na que o AOVE galego será protagonista. Esta actividade require invitación específica. Ás 16:00 horas terá lugar a reunión do consorcio do Grupo Operativo SUPRAOLIVO.
Inscrición
📅 24 de setembro de 2026
🕤 A partir das 09:30 h
📍 Hotel OCA Puerta del Camino, Santiago de Compostela
💻 Modalidade presencial e en liña
⚠️ Prazas limitadas
📝 Participación gratuita previa inscrición
SUPRAOLIVO: Innovación para o desenvolvemento sostible e adaptado do cultivo da oliveira en Galicia, Castela e León e Andalucía (REGAGE 25e00048407852). Proxecto de innovación de interese xeral por Grupos Operativos supraautonómicos da Asociación Europea para a Innovación en materia de produtividade e sustentabilidade agrícolas (AEI-Agri), no marco do Plan Estratéxico da PAC de España (PEPAC). A Dirección Xeral de Desenvolvemento Rural, Innovación e Formación Agroalimentaria (DGDRIFA) é a autoridade encargada da aplicación destas axudas. Fondos procedentes do Fondo Europeo Agrícola de Desenvolvemento Rural (80 %) e da Administración Xeral do Estado (20 %). Orzamento total do proxecto: 581 921,37 €. Subvención total: 581 921,37 €.
