A Asociación Galega de Cooperativas Agroalimentarias (AGACA) celebrou esta mañá no Hotel OCA Puerta del Camino de Santiago a 37 edición da súa Asemblea Xeral Ordinaria. A sesión reuniu representantes das cooperativas socias para facer balance do exercicio anterior, aprobar a planificación de 2025 e renovar os órganos de goberno da entidade.
Un dos acordos centrais foi a reelección de Carmen Rodríguez Rodríguez como presidenta da Asociación. Vicepresidenta da cooperativa Clun, Rodríguez continuará á fronte de AGACA durante os próximos catro anos, nun contexto marcado por retos relevantes para o cooperativismo galego e para o conxunto do sector agroalimentario.
A participación foi numerosa nos debates e votacións, tanto de forma presencial como on line. Estiveron representadas cooperativas que aglutinan máis do 80% da facturación e da base social das cooperativas socias.
Durante a Asemblea, aprobáronse as contas anuais, o informe de xestión e a aplicación de resultados do exercicio 2024. Tamén se presentaron a Memoria Anual de Actividades, o Plan de Actuación e os orzamentos para 2025.
As cooperativas integradas en AGACA suman máis de 28 000 persoas socias e dan emprego directo a preto de 6000 traballadoras e traballadores, sen contar o emprego inducido. A facturación conxunta, incluídas as sociedades participadas polas cooperativas socias, achégase aos 2330 millóns de euros.
Carmen Rodríguez renova mandato
A renovación de parte do Consello Reitor, a proposta das Xuntas Sectoriais, supuxo a continuidade de Carmen Rodríguez Rodríguez como presidenta da Asociación, cargo que ocupa desde 2021. É a primeira muller que encadea dous mandatos consecutivos á fronte de AGACA desde a súa constitución en 1988. Compaxinará o cargo coa vicepresidencia da cooperativa Clun.
Nesta nova etapa estará acompañada na vicepresidencia por Ana María Freire Fernández, representante da cooperativa Aira.
A reelección de Carmen Rodríguez e a elección de Ana María Freire como presidenta e vicepresidenta exemplifica o compromiso de AGACA coa promoción da igualdade e unha maior presenza feminina nos órganos de goberno das cooperativas. A Asociación traballa desde hai anos moi activamente para impulsar unha representación máis diversa e inclusiva, recoñecendo o liderado feminino como un valor clave para unha gobernanza cooperativa moderna, profesional e plural.
A Asemblea deu lugar tamén a renovación parcial do Consello Reitor, que será responsable da orientación estratéxica da Asociación durante o vindeiros catro anos. O novo equipo integrará representantes de cooperativas líderes como Clun, Aira, Coren, Viña Costeira, Horsal, Vitivinícola Arousana e Proterga, reflectindo a diversidade produtiva e territorial do sector.
Na súa intervención, a presidenta agradeceu de novo a confianza das cooperativas e subliñou a necesidade de contar cun novo marco normativo e institucional á altura da evolución do sector. Referiuse á futura Lei de Cooperativas de Galicia como unha oportunidade para adaptar a norma á realidade actual, e expresou a total disposición de AGACA para colaborar nun proceso construtivo coas administracións e coas propias cooperativas.
Tamén sinalou a importancia de modernizar o Rexistro de Cooperativas, os órganos de participación institucional e actualizar o réxime fiscal das cooperativas, vixente desde 1990. Apelou, ademais, a favorecer a incorporación de nova man de obra aos sectores cooperativos e a continuar apoiando o crecemento e intercooperación a través de programas públicos de consolidación empresarial. Entre os retos desta nova etapa destacou que “a nosa responsabilidade é seguir impulsando un modelo sostible, xusto e con futuro para as persoas socias e para o rural, por iso debemos reforzar a remuda xeneracional, a igualdade e a innovación”, engadiu.
Un cooperativismo en transición e con visión de futuro
Durante 2024, AGACA mantivo o seu compromiso co acompañamento técnico, a formación e a representación das cooperativas. Continuou colaborando en proxectos como Leadfarm 5.0, Women Empowerment in Agricultural Cooperatives, ES-Factory a rede e aceleradoras de Economía Social para impulsar e consolidar empresas en novas actividades emerxentes de Galicia e Norte de Portugal, o grupo operativo Blood4Goods ou Climalact.
A través do servizo de atención á base social, impartíronse máis de 50 accións formativas con máis de 1200 persoas participantes, e prestouse apoio técnico en áreas como gobernanza, benestar animal, xestión da auga, transición enerxética, fiscalidade, comunicación ou igualdade.
No plano institucional, AGACA participou activamente nos espazos de diálogo coa Xunta de Galicia e con entidades como Cooperativas Agro-alimentarias de España, ForoESGal ou CEPES. A Asociación está a implicarse tamén na elaboración da nova Lei de Cooperativas de Galicia e realizou seguimento doutros procesos lexislativos clave como o Estatuto da Muller Rural, a Lei de Agricultura Familiar ou a reforma da Cadea Alimentaria.
Desde a óptica económica, ademais de salientar o impacto da inflación e o contexto de incerteza no sector agroalimentario, alertouse sobre a perda de peso da produción galega na distribución da PAC. Galicia representa o 9,7 % da poboación activa do sector, pero só recibe o 6,5 % dos fondos. Subliñouse a necesidade de políticas diferenciadas que recoñezan o valor engadido do modelo cooperativo.
Clausura institucional
A xornada pechouse cun acto institucional no que interveu o conselleiro de Emprego, Comercio e Emigración da Xunta de Galicia, José González Vázquez. Tamén tomaron parte o presidente de Cooperativas Agro-alimentarias de España, Ángel Villafranca, o presidente de Caixa Rural Galega, Manuel Varela, e o presidente do Foro pola Economía Social (ForoESGal), Mino Martínez. Puxeron sobre a mesa o papel clave do cooperativismo e do sector agroalimentario como motores económicos e sociais no rural galego e a súa capacidade para xerar emprego de calidade, fixar poboación e contribuír á cohesión territorial.
CONSELLO REITOR 2025-2029
|
Presidencia |
Dna. Carmen Rodríguez Rodríguez |
Cooperativa Clun |
| Vicepresidencia | Dna. Ana María Freire Fernández | Cooperativa Aira |
| Secretaría | D. José Luis Rey Rodríguez | Cooperativa Coren |
| Tesourería | D. Javier Iglesias Sendín | Cooperativa Viña Costeira |
| Vogal | D. Rafael Tejeda Vázquez | Cooperativa Proterga |
| Vogal | D. Alberto Amil Chaves | Cooperativa Horsal |
| Vogal | D. Carlos Carrión Álvarez | Vitivinícola Arousana – Paco y Lola |
XUNTAS SECTORIAIS 2025-2029
1.- Xunta sectorial de Abastecementos e Servizos
Representante: Dna. Ana María Freire Fernández (Aira)
2.- Xunta sectorial de Gandería Intensiva. Avicultura, Porcino e Coellos
Representante: D. José Luis Rey Rodríguez (Coren)
3.- Xunta sectorial de Vacún de Carne, Ovino, Caprino e outras carnes
Representante: D. Rafael Tejeda Vázquez (Proterga)
4.- Xunta sectorial de Froitas e Hortalizas
Representante: D. Alberto Amil Chaves (Horsal)
5.- Xunta sectorial de Leite- Derivados Lácteos
Representante: Dna. Carmen Rodríguez Rodríguez (Clun)
6.- Xunta sectorial de Viño – Interior
Representante: D. Javier Iglesias Sendín (Viña Costeira)
7.- Xunta sectorial de Viño – Costa
Representante: D. Carlos Carrión Álvarez (Vitivinícola Arousana – Paco y Lola)
