O vindeiro 14 de xuño celebrarase no Pazo Baión (Vilanova de Arousa, Pontevedra) a xornada gratuíta “As mulleres protagonistas no modelo económico cooperativo. Uso de drons/RPAS en explotacións agrícolas”, organizada pola Asociación de Mulleres de Cooperativas Agro-alimentarias de España (AMCAE).
A actividade está dirixida a mulleres profesionais do sector agroalimentario interesadas en coñecer as oportunidades que ofrece a tecnoloxía de drons na xestión das explotacións agrícolas. O obxectivo é achegar esta ferramenta innovadora, que permite optimizar recursos e mellorar a eficiencia produtiva mediante a análise de datos en tempo real.
A xornada comezará ás 09.30 h coa recepción de asistentes e será inaugurada pola presidenta de AMCAE, Mª Dolores Calvo. A primeira intervención correrá a cargo de Eva Santos, do equipo técnico de AGACA, quen abordará as distintas vías de financiamento público dispoñibles para o sector.
A continuación, terá lugar unha sesión teórica sobre o uso de drons no mundo agrario, impartida polos pilotos e instrutores de voo Fernando Rodríguez e Sonia García, esta última pioneira no manexo de drons en España. Pola tarde, o programa inclúe unha demostración práctica de voo no propio recinto do Pazo Baión. A clausura da xornada está prevista para as 19.30 h.
Esta iniciativa está subvencionada polo Ministerio de Agricultura, Pesca e Alimentación, e conta coa colaboración de Nós, As Mulleres, AGACA, Cooperativas Agro-alimentarias de España, Condes de Albarei e Pazo Baión.
A participación é gratuíta pero require inscrición previa. Para máis información, pode contactarse a través dos teléfonos 649 542 318 / 609 070 135 / 611 020 719 ou mediante correo electrónico en agaca@agaca.coop e gestion@amcae.org.
