O vindeiro 26 de novembro, o Hotel OCA Puerta del Camino de Santiago de Compostela converterase no punto de encontro para entidades, persoal técnico e empresas da economía social que participarán no seminario “Axendas e iniciativas innovadoras en Economía Verde e Amarela”, organizado no marco da rede transfronteiriza Es-Factory.
A asistencia require inscripción previa no seguinte formulario: SEMINARIO “AGENDAS E INICIATIVAS INNOVADORAS EN ECONOMÍA VERDE Y AMARILLA ”
A iniciativa enmárcase no traballo das aceleradoras e centros de apoio empresarial de Galicia e do norte de Portugal, que colaboran para impulsar proxectos de economía verde, amarela e circular mediante novos modelos produtivos, tecnolóxicos e organizativos. O obxectivo desta xornada é ofrecer unha visión práctica das tendencias emerxentes e das ferramentas que poden reforzar a competitividade das cooperativas e doutras entidades da economía social.
PROGRAMA
A sesión abrirase ás 10:30 h coa recepción de participantes. A partir das 11:00 h, Demetrio Bedriñana, técnico de AGACA, achegará unha panorámica sobre a Axenda Intersectorial da Economía Verde, analizando o avance da sostibilidade no sector agroalimentario galego e as oportunidades que se abren para integrar novos procesos, medidas de eficiencia e innovación ambiental.
Ás 11:30 h, Jorge Miranda, da incubadora de iniciativas empresariais innovadoras do Norte de Portugal In.Cubo, afondará no papel da innovación tecnolóxica na mellora da produtividade e competitividade das entidades da economía social. A súa intervención proporá unha lectura comparada entre a chamada Economía Amarela, vinculada á creatividade, o coñecemento e a dixitalización, e os modelos tradicionais de emprendemento social, identificando sinerxías e espazos de colaboración.
De seguido, Felipe González presentará o proxecto Agrolistik, do que é cocreador, centrado na dixitalización e optimización loxística das explotacións agrarias mediante solucións tecnolóxicas accesibles e orientadas ao territorio. Pola súa banda, Javier López, da entidade de certificación EQA, explicará como o Certificado de Aforro Enerxético (CAE) pode converterse nunha nova entrada económica para o sector agrogandeiro, especialmente no contexto da transición enerxética e da mellora da eficiencia nas explotacións.
Antes do mediodía, Xavier Simón, do Observatorio Eólico de Galicia. CISPAC. Universidade de Vigo, abordará as posibilidades de crear comunidades enerxéticas dende a economía social, unha alternativa que permite producir e xestionar enerxía a nivel comunitario e que comeza a gañar presenza como ferramenta de resiliencia e sustentabilidade no rural.
A xornada pecharase coa clausura institucional a cargo de Marta Mariño, da Dirección Xeral de Traballo Autónomo e Economía Social, seguida dun cóctel ás 13:45 h, pensado como espazo para facilitar o intercambio de experiencias entre entidades participantes.
Inscrición aquí: SEMINARIO “AGENDAS E INICIATIVAS INNOVADORAS EN ECONOMÍA VERDE Y AMARILLA ”
O seminario forma parte do proxecto 0259_ES_Factory_1_E, cofinanciado polo Fondo Europeo de Desenvolvemento Rexional (FEDER) no marco do programa Interreg VI-A España–Portugal 2021–2027.
