- Especialistas en envellecemento e atención a maiores ofreceron claves para o coidado de persoas maiores dependentes e para envellecer activamente na Xornada “Coidar, coidarte”, na cooperativa Viña Costeira.
- A Asociación Galega de Cooperativas Agroalimentarias (AGACA) e Obra Social “la Caixa” levan a cabo a iniciativa “Coidar, coidarte” para contribuír ao envellecemento activo.
Persoas socias da cooperativa Viña Costeira (Valdepereira, Ribadavia) asistiron na tarde de onte á charla “Coidar, coidarte” impartida por expertas en atención a persoas maiores e con dependencia.
A xornada comezou cunha exposición, por parte de técnicos de AGACA, sobre a situación social das persoas maiores no ámbito rural, especialmente no que respecta ao potencial das cooperativas para acoller iniciativas dirixidas ás súas necesidades específicas.
A continuación, especialistas en atención a persoas maiores explicaron os diferentes procesos asociados ao envellecemento a nivel físico e psicolóxico e aconsellaron xeitos de reducir o deterioro vinculado á idade, mellorando a alimentación, incorporando exercicios físicos á rutina diaria e non descoidando a vida social.
Finalmente, dirixíronse ás persoas coidadoras, mostrando xeitos para facilitar a atención a maiores dependentes; entre eles, técnicas de mobilización manual a persoas con dificultades para desprazarse, consellos sobre alimentos saudables e mesmo os tipos de vestimenta máis cómodos.
Compromiso social
“Coidar, coidarte” responde ás demandas efectuadas polas cooperativistas que interviñeron en accións previas desenvolvidas por AGACA e Obra Social “la Caixa”, que reafirman deste xeito o seu compromiso co medio rural galego, contribuíndo ao seu avance social.
