NOTA DE PRENSA: Cooperativas Agro-alimentarias de España
- Os técnicos das federacións de cooperativas de Aragón, Galicia, Castela e León, Estremadura e Cataluña que participan no proxecto SUCELLOG recibiron o 20 de decembro unha sesión de formación sobre calidade dos biocombustibles, impartida polo coordinador do proxecto, a Fundación CIRCE.
- AGACA é a entidade que, en Galicia, desenvolve o proxecto.
Paralelamente, cada un deles expuxo os casos de auditoría en cooperativas que se desenvolveron no marco deste proxecto europeo, identificando os aspectos máis importantes dos mesmos, así como as barreiras e oportunidades detectadas na formulación do estudo de viabilidade técnico-económica sobre a posibilidade de que as cooperativas auditadas poidan converterse en centros loxísticos de biomasa.
A formación concluíu cunha visita ás instalacións da Cooperativa Agraria San Miguel. Trátase dunha deshidratora de forraxe localizada en Tauste, Zaragoza, que foi seleccionada entre outras candidatas para levar a cabo un estudo técnico-económico e un modelo de negocio avaliando as súas posibilidades como centro loxístico de biomasa.
SUCELLOG
O proxecto SUCELLOG está financiado polo programa Enerxía Intelixente para Europa da Comisión Europea. O obxectivo do mesmo (Triggering the creation of biomass Logistic centres by the agro-industry) consiste en impulsar a creación de centros loxísticos de biomasa nas agroindustrias -especialmente cooperativas- como complemento á súa actividade habitual, promovendo así unha nova liña de negocio de maneira que poidan diversificar a súa actividade cun baixo investimento.
Cooperativas Agro-alimentarias de España participa como socio no proxecto SUCELLOG (contando co apoio técnico de cinco das súas federacións rexionais: Aragón, Galicia, Castela e León, Estremadura e Cataluña), ao que se suman outras organizacións de cooperativas de Francia e Italia e as Cámaras Agrarias Austríacas, ademais de CIRCE como coordinador e WIP e RAGT como apoio técnico.
O concepto de SUCELLOG está baseado na explotación das importantes sinerxias que teñen as agroindustrias para converterse en produtores de biocombustibles sólidos e as súas actividades desenvólvense a nivel nacional e rexional nos catro países participantes.
Máis información do proxecto en www.sucellog.eu
